Район газетасы – һәр йортка

Абунә кампаниясе агымдагы елның 1 октябреннән 31 декабренә кадәр дәвам итә. Ел саен анда Баулы районы предприятиеләре җитәкчеләре дә катнаша. Алар газетага әти-әниләрен, ветераннарны, укытучыларын яздыра яки үзләре языла.
– Район газетасын яратып укыйбыз, ел саен язылабыз. Безне, иң беренче чиратта, спорт яңалыклары кызыксындыра. Газетада файдалы мәгълүмат шактый. Киләчәктә дә, уңышлы гына эшләп,  безне сөендереп торсын, – дип сөйләде 2нче спорт мәктәбе директоры Илнур Хәйруллин.
– Мин газетаны даими алдырам. Анда күп кенә кызыклы материаллар басыла. Хәзерге югары технологияләр заманында без газета-журналларга еш мөрәҗәгать итмибез. Минемчә, балаларны мәктәптән үк газета белән кызыксындырырга кирәктер. Район газетасы үзенең кече ватанын яраткан бар кеше өчен дә кызыклы булырга тиеш, – ди Потап-Томбарлы авыл җирлеге башлыгы Светлана Козлова.  
– Безнең әти-әниләр гомер буе газета алдырдылар. Хәзер бу традицияне без дәвам итәбез. Коллективыбыз район яңалыкларыннан хәбәрдар булып торсын өчен, эшкә дә яздырабыз, – ди Дәүләт ветеринария берләшмәсе начальнигы Илшат Гаязов. 
Район газеталарына почта бүлекчәләрендә һәм түбәндәге адрес буенча “Баулы-информ” редакциясе бинасында язылырга була: Баулы шәһәре, Пионер урамы, 9нчы йорт. Белешмәләр өчен телефон: 5-64-50. 
Фото: Булат Минһаҗев