Миргазиян ЮНЫСның тормыш кагыйдәләре (дәвамы)

Башы биредәhttp://bavly-tat.ru/news/kel-dftre/mirgaziyan-yunysny-tormysh-kagyydlre

Эше җаваплы дип, җитәкчелектән үзе теләп киткән кешене очратканым юк минем. 

Кер юа, идән себерә, камыр изә торган машиналар барлыкка килүдән, ни сәбәпледер, хатын-кызның эше кимемәде. Алла белсен: әллә тормыш мәшәкате арта тора, әллә машина үзе бер мәшәкать?

Без әле байлыкка өйрәнеп җитмәгәнбез. Кирәкме-юкмы, йорт җиһазы җыя, кием-салым... әллә нинди кирәксез нәрсәләр җыярга тотынабыз. Байлык әйбәт нәрсә ул, әгәр ул комсызлык, саранлык тудырмаса. 

Кызганычка каршы, яшәүнең һәркемгә яраклы уртак, универсаль кагыйдәсе юк. Берәүләргә бәхет китергән кагыйдә икенчеләрне бәхетсезлеккә дучар итә. Бәхетле булу кануны һәркемнең үзендә, ул аны үзе таба. . 

Гомер кыскарган саен шик, хорафатларга ышану көчәя бара икән ул. 

Картаю – тозсыз ашны хәтерләтә. Аш – каз шулпасы, сөләйман балыгы салып пешерелгән уха булуы мөмкин, ләкин тозы булмаганлыктан, аның тәме юк, тәмен картаю алган. 

Гомер буе нәрсәдер җитми адәм баласына. Туган көннән алып үлгәнче күңелдә даими бер мохтаҗлык яши. Шул мохтаҗлыкны җиңә белү генә бәхеткә ирештерә. 

Рус арасында, бигрәк тә тупасрак кешеләр арасында яшәгәндә, үз телеңдә сөйләшергә тартынасың. Ишетсәләр, өнәмәсләр, әллә ни уйларлар дип шүрлисең. Безнең канга ниндидер тирәк курку сеңеп калган. Әллә нинди астыртын, сәбәпсез курку. Шул тойгы үз гадәтләреңне тотарга, үз кыйблаңны сакларга комачаулый. Шул өркү безне теләсә нинди кыргый коллективка ярашырга, шул культурасыз, надан кешеләргә ошар өчен аракы эчәргә, әшәке сүз әйтеп сүгенергә мәҗбүр итә. Вөҗданыңны сыкрандырып булса да, син, әкеренләп, шундый шапшаклыкларга өйрәнәсең. 

Тормыш безне юаш кешенең кадерен белергә, аны санга сугарга өйрәтмәгән. Бу сыйфатны ни сәбәпледер өнәп бетермиләр бездә. Юашлык дөнья көтү өчен кулай булмаган, күрәсең. 

Һәр начарлык иң элек йомшак ихтыярлы кешеләрне җиңә. 

Рәхәтлекнең иң татлысы – җан тынычлыгыннандыр. 

Тормыш шартлары үзгәргән саен кунак җыюның сәбәбе һәм максаты үзгәреп тора. Элек туган-тумача кадерле кунак булган, хәзер – кирәклерәк кешеләр...

Юмарт кешеләрнең хәләл җефетләренә алла ярдәм бирсен. 

Яныңда ач кеше барында яшәүнең рәхәте, мәгънәсе югала.

http://syuyumbike.ru/rules/?id=8652