Якташыбыз иҗаты

Горурланыгыз татарлар......

Җир шарында күп таралган,
Татар дигән милләт бар.
Үрнәк ала бу халыктан,
Якын күреп милләтләр.

Изге җаны, динилеге,
Татарның милли моңы.
Илен - халкын мактый торган,
Фәһемле һәрбер җыры.

Татар ашларының тәме!
Аны хәстәрләү сере.
Бавырсагы, бәлешләре,
Бардыр меңләгән төре.

Ашка-суга, эшкә оста,
Татарның киленнәре.
Атламалы ак алъяпкыч,
Өзеп тора билләрен.

Татарның милли киеме,
Читекләре, калфагы.
Шәлъяулыкның чигүлесе,
Чын ефәктән аклары.

Чигүле читекләр киеп,
Өзеп бии кызлары.
Ишетелә гармун моңы,
Егетләрнең җырлары.

Кыйбла чишмә буйларында,
Бил алыша егетләр.
Чын мөселман, чын татарлар,
Алып батыр кебекләр.

Чын күңелдән горурланам,
Татар булуым белән!
Җырлыйм үз милли телемдә,
Тыңлый таулар һәм үзән.

Җанга якын җыр-моңнары,
Күтәрә күңелемне.
Мин – татар, – дип, горур булып,
Үткәрәм гомеремне.

Картаюны белми безнең,
Татарның картлары да.
Бәйгеләрдә җиңеп чыга,
Чабышкы атлары да.

Татар теле һәм горефе,
Шәригати көч алыр.
Татар милләте мактаулы,
Мәңгелек булып калыр.

Горурланыгыз, татарлар,
Саклагыз ана телен!
Ана телендә алыгыз,
Милләт телендә гыйлем.

Камил Шәмсуаров,

Исергәп авылы