Баулыда экологик рейдлар дәвам итә

Комиссия әгъзалары Баулы шәһәре янындагы автоюлларның торышын тикшерде. Рейдның төп максаты – чүпләнгән урыннарны ачыклау һәм рөхсәт ителмәгән чүплекләрне бетерү.

Тикшерү барышында шундый берничә участок ачыкланды. Аларның берсе Баулыга керү юлындагы урманда урнашкан. Биредә төзелеш калдыкларыннан алып, искергән җиһазларга кадәр төрле чүп-чар өелгән. Белгечләр бәяләвенчә, чүп биредә айлар буе җыелган һәм шактый зур мәйданны биләп алган.

– Биредә 4-5 куркынычлык классына керүче калдыклар – каты көнкүреш, төзелеш һәм агач чүп-чары табылды. Бу – тирә-юнь мохитне пычратучы җитди чыганак. Төзелгән акт нигезендә, экология министрлыгы башта бу җирнең кемнеке булуын ачыклый, аннары бу чүплекне юк итү вакытлары күрсәтелгән карар чыгара, – дип аңлатты Әлмәт территориаль идарәсенең юл хуҗалыгы объектларын мониторинглау һәм анализлау бүлеге әйдәп баручы белгече Руслан Унайбеков.

Тагын бер чүпләнгән участок Баулы – Потап-Томбарлы автоюлы буенда ачыкланды. Биредә көнкүреш һәм төзелеш калдыкларының еллар буе рөхсәтсез ташлануы теркәлгән. Белгечләр билгеләп үткәнчә, мондый хәлләр районда, кызганычка каршы, сирәк түгел.

– Экологлар белән бергә юлларны тикшергәндә юл буйларының шулай чүпләнүен күреп, бик борчылабыз. Төбәгебездә һәрвакыт тәртип булсын иде, – дип белдерде “Юл хәрәкәте иминлеге” дәүләт бюджет учреждениесенең Баулы районы профилактика бүлеге җитәкчесе Рәзидә Игнатьева.

Юл буе сервис пунктларының, юл кырыйларының һәм янәшәдәге территорияләрнең санитар-экологик торышын күзәтү табигатьне саклау һәм юлларда иминлекне тәэмин итү өчен мөһим адым булып тора.

Фото: Булат Минһаҗев