Лениногорскидагы Шашин һәйкәлен мәдәни мирас объектлары реестрына кертәчәкләр

"Бу карар тарихи әһәмияткә ия монументны сакларга һәм туристларның безнең төбәкнең уникаль тарихына игътибар юнәлдерергә мөмкинлек бирәчәк", – дип билгеләп үттеләр ведомствода.

Валентин Дмитриевич Шашин 1916 елның 3 (16) июнендә Бакыда нефтьче гаиләсендә туган. Инженер-геолог булып эшли башлаган, соңыннан совет хөкүмәтендә министр вазифасына кадәр күтәрелгән (1965–1970 елларда – СССР нефть чыгару сәнәгате министры, 1970–1977 елларда – СССР нефть сәнәгате министры). 1977 елның 23 мартында вафат булган.

1947 елдан 1960 елга кадәр Шашин башта Башкорт, аннары Татар АССРның нефть тармагында җитәкче вазифаларда эшләгән. Бу ике республика территориясендә яңа чыганакларны ачуга керткән өлеше бик зур. Галим һәм администратор тырышлыгы аркасында ТАССР совет нефть чыгаруның мөһим төбәкләреннән берсенә әверелгән. 1956 елдан 1960 елга кадәр ул "Татнефть" берләшмәсен җитәкләгән. Хәзерге вакытта тиешле компания аның исемен йөртә.

Композиция 1981 елда урнаштырылган. Аны күренекле Казан скульпторы Виктор Рогожин, архитекторлар Павел Федотов һәм Владимир Морозов белән бергә ясаган. Монумент традицион соңгы совет стилендә башкарылган: авторлар Шашин шәхесенең икътисад һәм фән өчен әһәмиятен күрсәтергә омтылганнар. 2002 ел башында һәйкәл мәдәни мирас объектлары исемлегенә кертелгән иде.