Татар Кандызында Карга боткасы пеште

Татар Кандызы авылында Карга боткасы пешерү бәйрәмен бөтен шартын туры китереп оештыралар. Иң башта өлкәннәр озатуында бөтен авыл буйлап бала-чага йөреп чыга. Алар ботка өчен төрле ярмалар, йомырка, май кебек ризыкларны җыялар.

– Карга боткасының үз йолалары да бар. Ул борынгы бәйрәм. Аны бездә балалар да, өлкәннәр дә яхшы белә, – дип сөйләде җирле “Ак калфак” оешмасы җитәкчесе Сиринә Вәгыйзова. – “Матур түтәй, бир безгә бер күкәй. Безгә бирсәң бер күкәй, тавыгың салыр йөз күкәй, – диеп такмаклап килеп керәбез, матур теләкләр әйтәбез, үзләрен дә бәйрәмгә чакырабыз. Халык аңлый, балаларны мәхрүм итмиләр, һәр кеше Карга боткасы әзерләр өчен үз өлешен кертә. Бу – бик матур йолаларның берсе.

Оештыручылар сүзләренчә, алар чарага килгәннәргә “Карга боткасы”ның тарихын, әлеге бәйрәмнең ел саен Татар Кандызында уздырылуын да сөйлиләр. Карга боткасы пешкән арада төрле уеннар уйныйлар.

– Карга боткасыннан һәр килгән кеше авыз итә, – ди Сиринә ханым. – Яз килүгә, туган якларга кошлар кайтуына сөенәбез. Илләребез тыныч булсын, чәчү эшләре уң булсын диеп телибез.  

ФОТО: Татар Кандызы мәдәният йорты