Баулының дүрт буын бер бәйрәмдә очрашты

Балалар бакчасына йөрүче алты яшьлек Радель Шәйхетдинов бәйрәмгә әтисе Илдарны, Флорис бабасын һәм карт бабасы Фатыхны чакырган. Радель үзе әтисе белән конкурсларда катнашканда, гаиләнең өлкән вәкилләре аларны горурланып күзәттеләр һәм көч биреп тордылар.

Бәйрәм программасы һәрвакыттагыча балалар өчен дә, өлкәннәр өчен дә күңелле сынаулар белән алып барылды.

Оештыручылар сүзләренчә, чараның төп максаты – бәйрәмне билгеләп үтү генә түгел, ә гаилә кыйммәтләрен ныгыту һәм үсеп килүче буынга традицияләрне тапшыру. Уртак бәйрәмнәр балаларда үз туганнары өчен горурлык хисләре уята, ә өлкәннәргә балачакны искә төшерергә һәм позитив булырга ярдәм итә.

– Киләсе 8 март – Әниләр бәйрәмендә дә карт әбиебез, дәү әниебез белән бергә катнашырга уйлыйбыз, – ди Фатых Вәлиәхмәтовның уртанчы кызы Илсөяр Галимова. – Бүгенге бәйрәм шундый күңелле, тарихи бәйрәм булып истә калачак.

Бәйрәм истәлеккә гомуми фото белән тәмамланды. Ата-аналар сүзләренә караганда, мондый чаралар якты хисләр генә түгел, балаларда кечкенәдән үк гаиләгә һәм Ватанга хөрмәт тәрбияләргә дә ярдәм итә.

Фото: «Ромашка» балалар бакчасы