Баулы районы мәдәният хезмәткәрләре спорт белән дус

Чара оештыручыларның җылы котлау сүзләре белән башланып китте. Шуннан соң катнашучылар иң кызыклы этапка – командаларны таныштыруга – күчтеләр. Яңгыравыклы исемнәр белән бергә, һәр һөнәрнең үзенчәлеген һәм команда рухын чагылдырган дәртле шигарьләр яңгырады. Китапханәчеләр, музей хезмәткәрләре, сәнгать осталары һәм клуб хезмәткәрләре спорт мәйданына хезмәттәшләр генә түгел, ә бердәм спортчылар булып бастылар.

Ярыш программасы шактый бай иде һәм катнашучылардан физик чыдамлык белән бергә бердәмлек тә таләп итте.

– Безнең команда “Бердәмлектә – көч” дип атала. Төпле әзерлек нәтиҗәсендә дүрт ел рәттән беренче урыннарны яулыйбыз. Быел да югары нәтиҗә күрсәтербез дип өметләнәбез, – дип фикерләре белән уртаклашты балалар сәнгать мәктәбе хезмәткәре Айназ Дәүләтова.

Көндәшләре дә сынатмаска җыена.

– Узган ел көмеш алган идек, быел максатыбыз – алтын! Безнең хезмәттәшләр спортның башка төрләрендә дә актив: “Россия чаңгы юлы”нда һәм башка ярышларда призлы урыннар яулыйлар, – дип билгеләп үтте мәдәният йортлары командасы вәкиле Арина Жарая.

Беренче җитди сынау – электрон коралдан ату этабында ук лидерлар билгеләнә башлады.

– Музейда эшләгәч, кешеләргә без гел утырып кына торабыз кебек тоела торгандыр. Ләкин без барлык чараларда да катнашырга тырышабыз. Менә ату буенча да нәтиҗәләребез яхшы, – диде туган якны өйрәнү музее хезмәткәре Гөлнур Фәсхетдинова.

Атудан тыш, һәр катнашучыга тагын өч дисциплинада үзенең спорт формасын исбатларга туры килде: этәрелү, яткан хәлдә күтәрелү һәм гимнастик эскәмиядә алга иелү. Трибуналар да буш тормады: коллегалары спортчылар өчен чын күңелдән җан атты.

– Китапханә системасындагы 64 хезмәткәрнең 60ы профсоюз оешмасында тора. Алар бик актив, районда үткәрелә торган барлык чараларда катнашалар, – дип сөйләде үзәкләштерелгән китапханәләр системасы директоры Лилия Фәхриева. – Бүген дә спартакиадада катнашабыз, беренче булмасак та, призлы урыннарны алмый калмыйбыз.

Иң кызу көрәш ГТО нормативларына нигезләнгән команда ярышлары вакытында булды. Монда хезмәттәшләрнең бер-берсенә ярдәм итүе һәм спорт азарты ачык күренде. Ярышлар ахырында судьялар нәтиҗә ясады: дүртенче урында – үзәкләштерелгән китапханәләр системасы; өченче урында – туган як музее хезмәткәрләре; икенче урында – мәдәният йортлары хезмәткәрләре.  Җиңүче – балалар сәнгать мәктәбе җыелма командасы.

Бу спартакиада тагын спортның рекордлар гына түгел, ә коллективны берләштерү, энергия алу һәм һәр иҗади уңыш артында көчле һәм бердәм команда торуын тагын бер кат исбатлады.