Баулының китап сөючеләр клубы үзенең юбилее көнендә солдатларга ярдәм итте

“Хәерле кич” гаилә клубы кунакларны гармуннар уйнап, җырлап каршы алды. Бүген биредә аеруча да бәйрәм рухы сизелә. Чөнки “Хәерле кич” клубы 25 еллык юбилеен бәйрәм итә. Бу клубка җыр-моң белән эшләп өйрәнгән апалар җыелган. Күңелле очрашу мизгелләре салмак кына эшкә күчә. Кемнәрдер кулдан токмач кисә, икенчеләре шифалы чәй ясау, аларны пакет һәм махсус пыяла банкаларга тутыру эшен башлап җибәрәләр. Моннан 25 ел элек китапханә каршында китап сөючеләрне берләштергән клубны Валентина Лабуткина һәм Мәдинә Дөлкарнәева оештырганнар һәм аны актив рәвештә эшләткәннәр. Алар икесе дә 40 елга якын китапханәдә хезмәт куйганнар.

–Клуб эше 2000 елда үз эшен башлады. Безгә үз эшебезне ярату, мавыгу бәхете елмайды, һәм безнең искиткеч, актив укучыларыбыз бар иде, – дип сөйләде  Валентина Лабуткина. – Барысы белән дә җылы итеп, якыннан аралашырга теләдек. Һәм без өйдәгечә, гади атмосфера булдырырга тырыштык. Хәзер без үзебез лаеклы ялда, хәзер без китапханәгә үзебез кунак булып киләбез, һәм монда да шундый ук искиткеч атмосфера: елмаюлы караш, яхшы мөгамәлә. Димәк, без башлаган эш, традицияләребез дәвам итә. – Валентина Владимировна ул вакытта мөдир иде, “Хәерле кич” дигән клуб оештырырга уйладык, – дип аңлатып үтте клуб оешу тарихын Мәдинә Дөлкарнәева. – Китап укучыларыбыз китапны яратып укыйлар, ул вакытларда укучыларыбыз, бүгенге клуб әгъзалары барысы да эшлиләр иде. Ул вакытта пенсиядә Әнвәрия апа гына иде. 25 ел эчендә барыбыз да пенсиягә чыгып беттек. Кызык чаралар үтә иде. Ниндидер язучының юбилее, ниндидер бәйрәм, авыл хуҗалыгы көне икән һәр кеше үзе үстергән әйберен алып килә һәм гади генә көн дә кызыклы бәйрәмгә әверелә иде. Укучыларыбызны яраттык, аларга чын күңел биреп китаплар тараттык.

Мәдинә апа китапханәгә йөрүчеләрнең ярыша-ярыша китап укулары, үзе китапханәче булып эшләгән елларындагы истәлекләр турында сөйләде. Үзләре башлаган эшне яшьләрнең дәвам итүенә сөенечен яшермәде. Ә клуб әгъзаларының даими рәвештә хәрбиләргә булышырга әзер булуы аларны тагын да берләштерә.

– Посылка әзерләгәндә чәйләр, үзебез җыйган шифалы үләннәрне китерәбез, эшне оештырабыз. Без бик күп әзерләп җибәрдек инде, – дип сөйләде Мәдинә апа. – Шунда минем дә иптәшемнең туганы мобилизациягә эләгеп 2023 елдан бирле катнаша. Аңа орден да бирделәр, яңарак кына кыска вакытлы ялга кайтып китте. Ике туган энебез контракт белән китте СВОга. Исән сау йөрсеннәр, көн дә алар өчен дога кылабыз.

Мондый кич утырулар еш була. Токмач кисү, чәйләр әзерләү, хәтта җылы оекбашлар бәйләүне дә оештырган алар.

Безнең әлеге клубка унбишләп кеше йөри, аларның дүртесе ветеран- китапханәчеләребез, – дип сөйләде Гаилә белән уку китапханәсе мөдире Рәзифә Хафизова. – Чәйләр әзерләү буенча яз көне өч чара үткәрдек, чәйләр әзерләдек, токмач җибәрдек. Волонтерларны чакырдык, ясаган әйберләрне алып киттеләр. Безнең әйберләр солдатларга барып җиткән. Минем бертуган сеңлемнең улы да өч ел мобилизованный. Без җибәргән әйберләрне аласызмы дигәч, рәхмәт. Алабыз, өйдә булган кебек, рәхмәт диделәр. Аннан балалар белән хатлар яздык. Апаларыбыз да язды. Энем кайткач үзе дә укыды берничәсен, калганнарын иптәшләренә алып китте.

Илләрнең тынычлыгын теләп, матур җырлар җырлый- җырлый гади көнне дә зур бәйрәмгә әйләндерә алган апалар солдатларга ярдәм итеп, җиңүне якынайталар, “Үзебезнекеләрне ташламыйбыз” илкүләм акциягә кушылалар.