Май башында җыярга мөмкин булган үләннәр һәм аларның файдасы

Кычыткан (крапива)
Җыю вакыты: чәчәк атканчы өске яшь яфракларын. Файдасы: канны чистарта, ялкынсынуга каршы тора, чәчне ныгыта. С һәм К витаминнарына, тимергә бай. Куллану: ашларда, салатларда, чәйдә, судагы төнәтмәсе, чәчне чайкау өчен төнәтмә.

Бака яфрагы (подорожник) Файдасы: яраларны төзәтә, ялкынсынуны киметә, ютәл вакытында ярдәм итә, ашказаны-эчәк эшчәнлеген яхшырта. Куллану: согы, судагы төнәтмәсе.

Тузганак (одуванчик) – яфрак, чәчәк, тамыр. Файдасы: үт һәм сидек кудыручы, бавырны чистарта. А, С, К витаминнарына бай. Куллану: салатлар, чәйләр, төнәтмә, кайнатмалар, сироплар ясау өчен.

Сәрдә үләне (сныть) Файдасы: җиңелчә чистарту үзлегенә ия. Матдәләр алмашын яхшырта. В төркеме витаминнары һәм С витаминына бай.  Куллану: ашлар, салатлар, бәлеш эчлегенә салалар.

Күкебаш (медуница) Файдасы: салкын тигәндә, ютәл вакытында файдалы. Иммунитетны ныгыта. Куллану: чәй, төнәтмә, ингаляция өчен.

Иван-чәй (кипрей узколистный) – яшь сабаклар. Файдасы: тынычландыра, ялкынсынуга каршы тора, ашкайнатуны һәм йокыны яхшырта. Искәрмә: төп җыю вакыты – июнь-июль, ләкин майда яшь үсентеләрне дә кулланырга мөмкин.

Канлы үлән (чистотел)  Файдасы: вирусларга каршы тора, тире авыруларын дәваларга (бетчәләр, экзема) ярдәм итә. Куллану: майдагы сыгынтысы, судагы төнәтмә, согы.  Искәрмә: канлы үлән агулы үсемлек. Күп итеп куллану тыела. Кулланганчы, белгеч белән киңәшегез. 

Каен яфрагы Файдасы: бәвел кудыручы, тир чыгаруны көчәйтә, тәнне чистарта, чәчне үстерә, баш тиресен дәвалый. Куллану: чәй, төнәтмә, мунча себеркесе.

Фото: freepik.com