Бөгелмәдә өч сабый ике көн әниләре мәете янында яшәгән

Лилия Бөгелмә балалар йортында тәрбияләнгән. Әбисе исән булуына карамастан, бер-берсе белән күптән аралашмаганнар. Социаль челтәрдә дуслары күбесе үлемендә аның сөяркәсен гаепли. Бу ир-атны психик яктан тотрыксыз, кызны гел кыйнаган диючеләр дә бар.

Бөгелмәдә ата-анасыз авыр хәлдә калган балаларга ярдәм күрсәтү үзәге хезмәткәрләре Лилияне яхшы хәтерли.

- Акыллы, тәртипле дип әйтә алмыйм. Шулай да спорт ярышларында актив катнаша иде. Йөгерү буенча урыннар алганы бар. Тугызынчы сыйныфны тәмамлап аш-су белгечлегенә укырга керде. Училище тәмамлады, - дип сөйләде исемен күрсәтмәвебезне үтенеп, үзәк хезмәткәре.

Бөгелмә районының эчке эшләр бүлеге балигъ булмаган яшьләр эшләре буенча инспектор Елена Москвичова аңлатма бирде:

- Безгә хәбәр булгач, социаль яклау бүлеге, гадәттән тыш хәлләр идәрәсе белгечләре белән күрсәтелгән адрес буенча бардык. Хатын-кызның өч баласы мәет янында ике көннән артыграк яшәгәннәр. Бу җинаятьтә гаепләнүче кеше тоткарланды, вакыйга буенча тикшерү эше дәвам итә, - диде ул .

Хәзер сабыйлар Бөгелмә хастаханәсенә урнаштырылган. 4 яшьлек малай йогышлы авырулар бүлегендә, ике яшьлек авыру кыз белән яңа туган сабый балалар медицина учреждениесендә дәвалана.

- Мәрхәмәтле кешеләр ярдәм итә. Баштарак олы малай фаҗига хакында еш сөйли иде, психологлар, табиблар ярдәме белән стресстан акрынлап котыла, хәле канәгатьләнерлек, - диделәр Бөгелмә үзәк хастаханәсе хезмәткәрләре.

Бөгелмә социаль яклау бүлеге хезмәткәрләре әйтүенчә, Лилия Гадеева, күп балалы ана буларак, пособиеләрен дә рәсмиләштерергә өлгермәгән булган.

Чыганак: shahrikazan.com