Баулылар “СМОГУкар”да узыштылар

Ярышларны ачу тантанасы Кырымсарай картлар һәм инвалидлар интернат-йорты директоры Галина Ланцова һәм проект авторы, уникаль тренажёрларны уйлап табучы Марат Ильясовның җылы сәламләве белән башланды. Оештыручылар катнашучыларга уңышлы стартлар һәм күтәренке кәеф теләделәр.

– 2019 елдан бирле без тренажёрларда 50дән артык ярыш үткәрдек. Аларда сәламәтлек мөмкинлекләре чикләнгән 1600гә якын кеше катнашты, һәм һәркайсы үз сәламәтлеген ныгыта алды. Бүген сез үзегезнең нәрсәгә өйрәнгәнегезне күрсәтәчәксез, – дип мөрәҗәгать итте катнашучыларга Марат Ильясов.

Шуннан соң ярышта катнашучыларның исемнәре яңгырады – барлыгы 30 кеше үз көчен сынап карады. Һәр узышта 3әр кеше стартка басты, алда аларны 15 яки 30 метрлы дистанция көтә иде. Катнашучыларның барысы диярлек инструкторлар озатуында хәрәкәт итте – бу куркынычсызлыкны тәэмин итте һәм спортчыларга үз-үзләренә ышанычны арттырырга ярдәм итте.

Катнашучыларның күбесе тренажёрлар белән яхшы таныш һәм “СМОГУкар”лар белән оста идарә итә. Быел проект авторы Марат Ильясов интернат-йортка шундый өч тренажёр бүләк итте – хәзер монда яшәүчеләрнең даими актив шөгыльләнү өчен мөмкинлекләре тагын да артты.

– Быел тормышка ашырыла торган проектларда биредә яшәүчеләрнең 100 проценты диярлек катнаша: хәтта аз хәрәкәтләнүче төркемнәр өчен дә тиешле шөгыльләр сайланды. Бу – идән уеннары, вак моториканы үстерү күнегүләре һәм тренажёрларда тренировкалар. Боларның барысы да безнең тәрбияләнүчеләргә ни өчен кирәк соң? Төп максатыбыз – аларның физик активлыгын арттыру, сәламәтлекләрен ныгыту һәм рухи күтәренкелек бүләк итү, – дип сөйләде Галина Ланцова.

2026 елда Марат Ильясов командасы Баулы интернат-йортында өлкәннәрнең физик активлыгын саклауга һәм тормыш сыйфатын күтәрүгә юнәлдерелгән берьюлы ике проектны тормышка ашыра.

– Безнең “Ял көне СМОГУ-турлары” проектында Баулы районы, Азнакай һәм Җәлил интернат-йортлары катнаша. Аларның һәркайсында аена өчәр тапкыр төрле чаралар үткәрәбез. Программа кысаларында, аена “СМОГУкар”ларда 6шар дәрес оештырыла. Без уңай үзгәрешләрне ачык күрәбез: катнашучыларның хәрәкәт активлыгы аша сәламәтлекләре ныгый. Хәзерге вакытта проект кысаларында инде өченче ярыш үткәрәбез – моңа кадәр мондый чаралар башка ике интернат-йортта булды, – дип белдерде Марат Ильясов.

Тренажёрларда шөгыльләнү физик форманы яхшырта, катнашучыларга өзлексез алга хәрәкәт итү өчен көч-куәт һәм дәрт бирә. Шуңа күрә биредә яшәүчеләр “СМОГУкар”ларда бик теләп йөри. Ярышта катнашучылар үз тәэсирләре белән күтәренке рухта бүлешә – бу узышлар алар өчен үзләрен көчле һәм актив итеп тоюга яңа этәргеч булды.

– Без хәзер “СМОГУкар”ларда даими шөгыльләнәбез, бу безгә бик ошый. Хәрәкәтләнәбез дә, көндәлек мәшәкатьләрдән дә ял итәбез. Ә мондый ярышлар — аеруча кызыклы, – ди Александр Моисеев.

– Мондый тренажёрларда беренче тапкыр гына ярышуым түгел, шуңа күрә дистанцияне җиңел үттем. Бу сәламәтлек өчен дә, күңел халәте өчен дә бик файдалы, – дип сөйләде Михаил Ушаков.

Бәйрәм күтәренке мизгелләрдә тәмамланды. Барлык катнашучылар да медальләр, дипломнар һәм истәлекле бүләкләр белән бүләкләнде. Бер-береңә ярдәм итү һәм җылы мохит мондый проектларның ни дәрәҗәдә мөһим һәм кирәк булуын тагын бер тапкыр исбатлады

Фото: Айгөл Идиятуллина