3 сентябрьдә Террорчылыкка каршы бердәмлек көне билгеләп үтелде. Бу көнне районның барлык мәктәпләрдә дә сыйныф сәгатьләре, әңгәмәләр оештырылды. Чараларның төп максаты – яшь буында терроризмга каршы тору позициясен ныгыту, шулай ук фаҗигадә һәлак булганнарны искә алу. Исергәп авылы мәдәният йорты һәм китапханә хезмәткәрләре дә укучылар өчен төрле темаларга чаралар оештырып торалар. Террорчылыкка каршы бердәмлек көне уңаеннан да “Террор корбаннары – балалар” дип исемләнгән хәтер сәгате үткәрделәр.
Беслан фаҗигасе хәтердә яңарды
Төньяк Осетиянең Беслан шәһәрендәге канлы фаҗига бүгенге көндә дә һәр кешенең күңелендә саклана. Бу фаҗигагә бәйле рәвештә, Террорчылыкка каршы көрәш көне гамәлгә кертелде. Тарихка күз салсак, 2004 елда Белем көнендә террорчылар Беслан мәктәбен камап алып, бер меңнән артык кешене тоткын итеп тотты. Теракт вакытында 300дән артык кеше, шул исәптән 186 бала вафат булды, 783 кеше төрле дәрәҗәдә җәрәхәтләр алды.
– Чара барышында балаларга 2004 елның 1 сентябрендә Беслан шәһәре мәктәбендә булган коточкыч канлы фаҗига турында сөйләдек, – ди мәдәният йорты сәнгать җитәкчесе Рәзифә Хәкимова. – Балалар бу фаҗига турында видеоролик карап тетрәнделәр дисәм дә ялгыш булмас. Чөнки экстремистлар һәм террорчылар өлкәннәрне дә, укучы балаларны, хәтта кечкенә сабыйларны да аямый, җан өшеткеч вакыйгалар кылдылар. Мондый хәлләр кабатланмасын иде.
Тормыш имин булсын
Мәгълүмат сәгатендә катнашучы балалар террорчылыкның барлыкка килү тарихы, аның максатлары, ул җәмгыять һәм дәүләт өчен китергән зур куркыныч турында да кыскача мәгълумат алдылар. Чара бер минут тынлык белән тәмамланды.
– Мондый хәлләрнең булуына ышанырлык та түгел. Бик кызганыч, укырга диеп мәктәпкә килгән малайлар һәм кызлар, аларның туганнары күбесе юк ителгән. Видео караганда хәтта елыйсы килде, – дип, фикерләре белән бүлеште бишенче сыйныф укучысы Нурислам Тимаев. – Мондый дәресләр ел саен була. Аннан соң да озак кына сөйләшәбез, фикер алышабыз. Чит кешеләрнең ялган сүзләрен аера белергә кирәк, хәзер бигрәк тә куркыныч.
– Һәр заманның үз таләпләре, үзгәрешләре булып торган. Соңгы елларда илдә барган вакыйгалар белән бәйле фаҗигаләр заманында яшибез. Үсеп килүче яшьләрне, балаларны төрле фаҗигале хәлләрдән, төзәтә алмаслык хаталар ясауларыннан саклау – безнең бурыч дисәк тә була. Хәзер акча, ялган сүзләр белән алдау заманы да икәнен истән чыгармаска кирәк, – дип сөйләде авыл китапханәсе мөдире Миләүшә Йосыпова. – Уку чорында гына түгел, ел әйләнәсе мәктәптә, балалар бакчасында, китапханәдә, хәтта табигать кочагына чыгып та балалар, яшьләр өчен төрле профилактик чаралар, әңгәмәләр, мәгълүмат сәгатьләре, түгәрәк өстәлләр оештырабыз. Бүген үткәргән мәгълүмат сәгате дә бик үтемле булды. Укучылар видеороликны тын да алмый диярлек карадылар, аннан соң бик дулкынландыргыч фикер алышу булды. Минемчә, мондый профилактик дәресләр бик мөһим. Алар нигезендә терроризмның нинди куркыныч икәнен аңлатасы килә.
Оештыручылар сүзләренчә, укучылар профилактик чаралар, җәмәгать тәртибе хакында да мәгълүмат алганнар, үзләрен һәм якыннарын саклау кагыйдәләрен белүнең мөһимлеген аңлаганнар.
Нет комментариев