Мәктәп укучыларының көзге каникуллары башланды, димәк, кул эшләре өйрәнер өчен дә кулай вакыт. Татар Кандызы мәдәният йорты режиссеры Луиза Шакирова “Агачны яндырып рәсем ясау” буенча мастер-класс үткәрде. Катлаулы да, җаваплы да булган чара балалар өчен кызыклы булды.
Мастер-классны башлар алдыннан катнашучыларга кыска гына инструктаж үткәрелде. Аннан соң һәркем үзенең күңеленә хуш килгән рәсемне сайлады. Аны укучылар тырыша-тырыша такталарга күчереп ясадылар һәм иң җаваплы булган эшкә – яндырып ясауга керештеләр.
– Барлык материаллар да мәдәният йорты хезмәткәрләре тарафыннан бирелде. Балалар кызыксынып эшләделәр, – дип сөйләде чараны оештыручы Луиза Шакирова. – Малайлар һәм кызлар үзләренең якыннарына бүләк әзерләү өчен шулай тырышалар. Чөнки тиздән иң матур, иң эчкерсез бәйрәм – Әниләр көне. Балаларның күбесе әниләренә, әбиләренә атап бүләкләр ясадылар. Безнең балалар өчен агачны яндырып ясау техниканы – яңа ысул. Әле өйрәнәсе әйберләр байтак.
Фото: Луиза Шакирова
Нет комментариев