Баулы ветераны Җиңү көнен көтә

Быел 99нчы яше белән баручы сугыш ветераны Халик Кәримов ачык зиһенле. Балачагы да ятимлек белән үткән, аннары сугыш...

– Ятим калдык, өч бала калдык без. 1929 елда әтиебез үлде. Ул вакытта иң олыбызга җиде яшь, миңа-өч, сеңлемә ярты яшь кенә иде, – дип сөйләде Халик абый. – Сугыш башланган көнне без кырда идек. Ятим булгач, эшкә дә яшьли тотындым. Ашарга кирәк бит, әз бирәләр. Тырма да тырмадым, сабан да сөрдем. Бөтен авырлыклар безгә төште инде, хатын-кызларга. Сыерларга кадәр җиктеләр бит, сабан сөрергә кирәк, тракторлар юк иде. Яхшы атларны алып бетерделәр сугышка. Югалтулар күп булды, йөзләгән шәһәрләр, авыллар. Йортларның торбалары гына калды, юк иттеләр.

Ветеран сөйләве буенча, ул 1945 нче елның маена кадәр ул укчылар частендә рядовой сугышчы буларак хәрби хәрәкәтләрдә катнаша. Хезмәтен бомбардировка авиациясенә хезмәт күрсәтү частендә үткәрә.

– Самолетлар безне алгы полосага үткәрми, без 20-30 километр артта. 15 километр читтән без бомбаларны җибәреп тордык сугыш вакытында, – дип искә алып сөйли ветеран. – Өйрәнүләр күп булды, ул бер кайчан да бетми, шуның өчен солдат бит ул. Беткәнче служить итәргә тиеш. Мин җиде ел хезмәт юлы үттем. Дисциплина ул кадәр үк каты түгел иде. Авиациядә ул йомшаграк инде, әйтеп булмый, шунысы рәхәт булды. 

Сугыш чорындагы югалтулар ачысы ветеран күңеленә бүгенге көндә дә тынгылык бирми.

– Бик күп югалтулар булды инде. Унар меңләп түгел, йөзәр меңләп түгел, миллионлап югалтулар булды. Күп, бик күп, – дип күз яшьләрен сөртә Халик Кәримов. – Үземнең генә дә җиде туган киткән идек, берүзем генә кайттым мин. 1941-1942 елларда ук һәлак булып беттеләр. Безнең гаиләдән генә җиде җан кыелды, ә нәселдән күпме? Сугышның һәр гаиләгә кайгы китергәнен генә уйласаң да...миллионлап инде, миллионлап.

Халик Кәримов 1951 елның ноябрендә генә демобилизацияләнә. Бүгенге көндә ветеранның күкрәге тулы орден һәм медальләр. Ул II дәрәҗә Бөек Ватан сугышы ордены, «1941-1945 еллардагы Бөек Ватан сугышында Германияне җиңгән өчен» медале һәм тагын бик күп юбилей медальләре белән бүләкләнгән. Халик Кәримов Җиңү көнен дә дулкынланып көтә,бәйрәмне ул балалары, оныклары белән каршы алачак.

Бу хакта тулырак “Хезмәткә дан” газетасы битләрендә укырга мөмкин булачак.