Яңа Чүте авылында зур өмәгә җыелдылар

Өмәгә җыелган зур команда һәр елдагыча бүленеп, эшне берничә җирдә бер үк вакытта башкаралар. Мәсәлән, берничә хатын-кыз авыл мәчетенең эчен юып, паласларын кагып, тирә-ягын җыештырдылар. Икенче зур эшче төркем чишмә буенда эшләде. Алар көче белән корыган агачлар киселде, вак куаклар җыйнакландырылды, чүп-чар җыелды, үләннәр чабылды. Чишмә буендагы ял итү зонасы да санаулы сәгатьләр эчендә  яңа төс алды: рәшәткәләр һәм утыргычлар буялды, тирә-ягын чиста итеп себереп тә куйдылар. Чишмәнең су агып төшә торган юллары чистартылды. 

– Бу өмә ел да уза бездә! Нык зур ярдәм авылыбыз өчен. Егет-кызлар дәррәү кубып ярдәм кулын сузалар. Матди яктан да, эш белән дә, – дип сөйләде Йолдыз Шакирова. –  Ераклардан кайталар шушы өмәдә катнашу өчен. Хәзер инде балалар-оныклар алмашка килә. Авылыбыз бетмәсен, таралмасын дип җан атып йөрүче егетләребез-кызларыбыз булганда бу традиция сакланачак әле.

Өмәчеләрнең өченче өлеше авыл зиратын тәртипкә китерде. Зиратның иске ихаталарын алдылар, зур агачларны кистеләр.

– Чын мәгънәсендә зур өмә узды, – ди Яңа Чүте авылында туып-үскән Римма Яруллина. – Елдагыча эш бик күп булды, күп эш эшләнде. Барлык катнашучыларга зур рәхмәт.

Өмәне оештыручылар, эшкә килгән өмәчеләргә учакка казан асып, тәмле аш белән дә сыйладылар.

Фото: Йолдыз Шакирова