Баулыда Ураза гаетен уздыру тәртибе

Баулы районы имам-мөхтәсибе Әнвәр хәзрәт Хәмитов редакциягә хәбәр иткәнчә, Баулы шәһәре һәм авыллары мәчетләрендә әлеге мөбарәк бәйрәм иртәнге сәгать 6да Коръән вәгазьләре белән башланып китәчәк, гает намазы 6 сәгать 30 минутта укылачак.

30 мартта сәгать 10да Баулының “Гали” мәчетендә балалар өчен Ураза гаете бәйрәме дә була. Анда төрле бәйгеләр үткәрү, бүләкләр тарату, чәй табыны оештыру күздә тотыла.

Татарстан Мөфтие Камил хәзрәт Сәмигуллинның бәйрәм вәгазе турыдан-туры эфирда “ТНВ-Татарстан” һәм “ТНВ-Планета” телеканалларында күрсәтеләчәк.