Салих авылының «Нәжметдин» мәчетендә ифтар булды
Авыл халкы өчен авыз ачу мәҗлесе Салих авылыннан чыккан Илдар Нурулла улы Габдрахманов исеменнән уздырылды. Мәҗлестә Баулы районы башлыгы урынбасары Ринат Хәмидуллин, Баулы имам-мөхтәсибе Әнвәр хәзрәт Хәмитов, авыл җирлеге башлыгы Илнур Хәйруллин, Заһит Галләметдинов та катнаштылар.
Салих авылы имамы Исмәгыйль Сәгыйть улы дөньяви вәгазьләр укып ишеттерде. Аннан соң авыл халкы, килгән кунаклар моңлы азаннан соң су белән авыз ачып, ахшам намазына бастылар. Аннары мул табын артына утырыштылар. Ифтар мәҗлесе коръән аятьләре уку, вәгазьләр тыңлау эчтәлекле чыгышлар белән үрелеп барды.
– Быел Рамазан ае башланганнан алып, мәчетебездә икенче тапкыр зурлап ифтар уздырдык. Тоткан уразаларыбыз, укыган догалар Аллаһы Тәгалә тарафыннан кабул булсын иде, – ди Тәслия Галиева. – Ел саен уразаларны калдырмаска, тотып бетерергә тырышабыз. Бүгенге көндә авылда барыбыз да әбиләр генә калып барабыз, сәламәтлекләре чикләнмәгән булса, сәламәт булганнар ураза тота. Изге айда ифтар мәжелесен әзерләүче, “тәмле куллы” кызларыбыз Миләүшә Шаймарданова, Гүзәл Сәфиуллина, Ләйсәнә Таһирова, Гүзәл Вәлитова, Гөлчәчәк Закировага зур рәхмәт. Кызларыбыз тәмле итеп ризыклар әзерләде, алып килгән күчтәнәчләрне матурлап өстәлләргә куйдылар.
Следите за самым важным и интересным в Telegram-каналеТатмедиа
Нет комментариев