Баулылы танышына үтерү белән янаган

Гражданин А., алкоголь исереклеге хәлендә, Баулы районының бер авылында яшәүче танышының өенә барган. Шул хәлдә аның белән мөнәсәбәтләрен ачыкларга теләгән. Эчтән бикле ишекнең келәсен ватып, танышының рөхсәтеннән башка эчкә кергән.

Аннары йорт хуҗабикәсе белән низагка кереп, үтерү белән яный башлаган, кулына очлы предмет белән суккан.

Баулы суды быелның май башында А.ны хөкем иткән. Ул суд утырышында гаебен тулысынча таныган һәм үкенүен белдергән. Суд, алдагы хөкем карары буенча билгеләнгән җәзаны исәпкә алып,  аңа гомуми режимдагы колониядә иректән мәхрүм итү рәвешендә җәза билгеләгән.