Башкортстанда яшәүче ир-ат танышының күзенә пычак кадаган

Уфа районара тикшерү бүлеге Кырмыскалы районында яшәүче 59 яшьлек ир-атка карата җинаять эше ачкан. Ул танышын үтергән дип шикләнәләр. Бу турыда Тикшерү комитетына сылтама белән «Башинформ» хәбәр итте.

Тикшерү версиясе буенча, 18 гыйнварда 59 яшьлек һәм 30 яшьлек ике ир-ат Прибельский авылына 82 яшьлек танышлары янына кунакка бара. Бераз салып алгач, иптәшләр талаша башлый. Яшьрәк ир-ат өйдәге карт хуҗабикәгә карата ямьсез сүзләр әйтә. Хуҗабикә бу вакытта исереп йоклап ята торган була. 

Талаш сугышка әверелә. Җинаятьтә шикләнелүче ир-ат ямьсез сүзләр сөйләгән 30 яшьлек ир-атның күкрәгенә, аннары күзенә пычак белән кадый. Яраланган ир-ат урында ук һәлак була. Үтерүче исә качып китеп бара.

Хуҗабикә хатын йокыдан уянгач, өйдә ир-ат мәете табып ала. Ул полициягә хәбәр итә. Җинаятьтә шикләнелүче ир-атны бик тиз эзләп табалар. Сорау алганда ул үз гаебен таный.

Тикшерүчеләр җинаять урынын караган, тиешле экспертизалар билгеләнгән, шаһитларны сораштыралар, диелә бу хәбәрдә.

Фото: pixabay.com

Чыганак:  https://intertat.tatar/news/incident/22-01-2021/bashkortstanda-yash-che-ir-at-tanyshyny-k-zen-pychak-kadagan-5800767