Татарстан игенчеләре 2 миллион тоннадан артык ашлык суктырды

Татарстанда бүгенге көндә 1,3 миллион гектар мәйданда игеннәр җыеп алынган. Бу барлык мәйданның 83 проценты дигән сүз.

ТР Авыл хуҗалыгы һәм азык-төлек министрлыгының матбугат хезмәте хәбәр иткәнчә, игенчеләр 2 миллион тоннадан артык ашлык суктырган.

Республикада уртача уңыш гектарыннан 15,7 центнер тәшкил итә. Уртача уңышның күләме буенча беренче өчлектә — Тукай (22,7 центнер), Тәтеш (22,2 центнер) һәм Чистай (20 центнер) районнары.

Зәй муниципаль районы игенчеләре урып-җыюны беренче булып тәмамлады. Чистай, Нурлат һәм Мөслим районнарында да урак төгәлләнү алдында.

Фото:  /pixabay.com

Чыганак:  https://tatar-inform.tatar/news/agriculture/12-08-2021/tatarstan-igenchel-re-2-million-tonnadan-artyk-ashlyk-suktyrdy-5833532