“Озатып калды күпме аналар”

Озатып калды күпме аналар

Фәрештәләр саклап йөртсен диеп,

Күпме ана теләк теләде.

Күрсәтмәскә тырышып күз яшьләрен,

Озатканда сагыш биләде.

Утта янма, суда батма, улым,

Көтәм синең исән кайтуың.

Сугышка дип үстергән мени соң,

Газиз ана кадерле улын.

Илебезнең данын саклар өчен,

Ир-егетләр китте сугышка.

Җиңү белән әйләнеп кайт, солдат,

Сине көткәннәрең хакына.

Күпме ана йөрәгенә сугыш

Төзәлмәслек сала ярасын.

Тыныч тормышларга ниләр җитә,

И Аллаһым безне сакласын.

Ана көтә төн йокламый улын,

Йокылары меңгә бүленә.

Кайда, ничек аның нарасые –

Хәвефле уйлар күңелендә.

Ана күңеле тыныч булыр иде

Әгәр кан коешлар булмаса.

Йөрәкне әрнетеп, шул сугыштан

Табутлары кайтып тормаса.

Тәслия Галиева

Салих авылы

Фото: https://photo.tatar-inform.ru/301022-Отправка/i-vpgm5Vf