Хезмэткэ дан
  • Рус Тат
  • Бәйрәмнәргә кадәр эш күп

    Муниципаль район башлыгы Альберт Хәбибуллин оешма җитәкчеләре белән үткәргән киңәшмәгә шәһәр советы депутатлары да чакырылды.

    Киңәшмәнең төп темалары бер-берсе белән бәйләнгән иде - май бәйрәмнәренә әзерлек һәм санитар чистарту һәм төзекләндерү буенча икеайлык уздыру. Район башкарма комитеты җитәкчесенең беренче урынбасары Ринат Хәмидуллин бәйрәм чаралары планы белән таныштырды. 1 май көнне Октябрь мәйданында митинг, "Славян базары" концерты һәм авыл хуҗалыгы ярминкәсе узачак. Бу көнгә шулай ук фонтан ачу планлаштырылган. 8 һәм 9 май көннәрендә Баулыда Җиңү көне хөрмәтенә митинглар узачак, ә кичен Октябрь мәйданында тынлы оркестр һәм ветераннар концерты үткәрү күздә тотыла. Барлык хезмәт коллективларын Ринат Хәмидуллин Җиңү көне фондына бер көнлек хезмәт хакын күчерергә өндәде. Бу акча бәйрәм чараларын уздыру һәм сугыш ветераннарына ярдәм күрсәтү өчен кирәк.
    Әлеге бәйрәмнәрне лаеклы каршылау өчен, шәһәрне һәм башка торак пунктларны тәртипкә китерергә кирәк. Санитар чистарту һәм төзекләндерү икеайлыгы чаралары планы турында шәһәр башкарма комитеты җитәкчесе Гамил Ибраһимов сөйләде.
    - Шимбә өмәләрен формаль рәвештә уздырырга кирәкми. Эшнең конкрет нәтиҗәсе булырга тиеш, - диде район башлыгы. - Быел Пионер урамын төзекләндерү шундый нәтиҗә бирсен.
    Альберт Хәбибуллин баулылыларның яз һәм көз агач утыртуын, әмма аларның күбесенең сакланмавын билгеләп үтте. Төрле җирдә куелган күпсанлы автомобильләр тагын бер проблема булып тора. Автомобиль хуҗаларының байтагы гараж кооперативлары һәм автостоянкалардан файдаланмый башлады. Моны исәпкә алып, транспортның хәрәкәт итү һәм юл билгеләрен урнаштыру схемаларын яңартырга кирәк.
    Район башлыгы шулай ук авыл җирлекләре башлыкларының игътибарын Бөек Ватан сугышында катнашучылар хөрмәтенә куелган һәйкәлләргә юнәлтте. Бәйрәмгә кадәр аларның барысы да тәртипкә китерелергә тиеш.

    Нравится
    Поделиться:
    Реклама
    Комментарии (0)
    Осталось символов: