Баулы районында театр атналыгы бара

Томбарлылар “Әниләр һәм бәбиләр” спектаклен “Театр язы” район бәйгесе өчен әзерләгәннәр. Халыкара хатын-кызлар көнендә авылдашларына күрсәткәннәр, күптән түгел жюри хөкеменә тәкъдим иткәннәр. 

Спектакльне сәхнәгә куючы режиссёр – мәдәният йорты директоры,  театр түгәрәге җитәкчесе Айгөл Нәүрүзбаева, рәссам-декоратор – мәдәният йортының сәнгать җитәкчесе Илмира Минәҗева. Рольләрне мәдәният хезмәткәрләре һәм башка һөнәр ияләре башкарды.

– Бу спектакль белән гастрольгә беренче чыгуыбыз. Эшләнгән эшне күрсәтик, башка авыл тамашачысы фикерен дә белик дип, Кызылъярга барырга булдык. Бераз курыктык, чөнки авылдашларың алдында кую – бер нәрсә, ә икенче авылда – башкача. Кабул итәрләрме, аңларлармы, дигән борчу булды, – дип, тәэсирләре белән уртаклашты Айгөл Нәүрүзбаева.

Курыккан эш хәерле була дигәндәй, спектакль уңышлы үтте, кызылъярлар үзешчән артистларның чыгышын җылы кабул иттеләр. Башта тамашачы җитди булып тоелса да, тора-бара спектакль аларны үз эченә бөтереп алып кереп китте. Чөнки үзешчән артистлар үзләренең рольләрен оста итеп уйнадылар, тамашачыларны көлдерделәр дә, елаттылар да. 

“Кызылъяр сәхнәсендә без үз өебездә кебек уйнадык, чөнки мәдәният хезмәткәрләре безне җылы кабул иттеләр, – ди Айгөл. – Без Кызылъяр мәдәният йорты белән җылы мөнәсәбәттә, мин аларны бик хөрмәт итәм. Бу юлы да мул табын белән каршы алдылар, зур рәхмәт. Кызылъярларда татар халкына хас кунакчыллык бар, шулкадәрле гадиләр бөтенесе дә. Авыл халкына да бик рәхмәтлебез, тыныч кына, рәхәт итеп карап утырдылар, тыз-быз йөрүче булмады, безнең өчен анысы да бик мөһим. Шуңа күрә безгә уйнавы кыен булмады”.

“Кызыльярда сәхнә дә, зал да зуррак,шуңа шәхсән минем күңелне бераз курку биләп алган иде, тавыш ишетелерме-юкмы, югалып калмабызмы дип. Шулай да барысы да яхшы үтте, үзебезгә дә бик ошады, жюрига куйганнан да яхшырак килеп чыкты кебек, – дип сөйләде Валентина ролен уйнаган, авыл китапханәчесе Эльвира Әхмәтҗанова.

Бу бер ай эчендә алар рольләренә шулкадәрле кереп киткәннәр, театр дип янып-көеп яшәгәннәр, үз тормышлары икенче планга калган.

“Телебездә гел шушы спектакль, сөйләшүләр дә үзгәрде. Айгөл белән бер-беребезгә Гуляя апа да Валентина дип эндәшә башладык. Ирләребез дә Зарифулла белән Сашенькага әйләнде, – дип көлә Эльвира. – Без яңабаштан үзебезне бәбәй тапкан аналар кебек хис иттек. Театр уйната да, елата да, көлдерә дә. Рәхмәт Ленирга, мәдәният хезмәткәрләренә. Кешенең йөзеннән нур балкып торганда, килеп керүе дә, спектакль яки концерт куюы да рәхәт бит”.

Спектакльне карарга башка авыллардан, Баулыдан да килгәннәр иде. 

“Башка авыллардан коллегаларым килгәнгә бик сөендем. Халыкара театр көне уңаеннан спектакль куюыбыз бик матур вакыйга булды безнең өчен, – ди Айгөл Нәүрүзбаева.

“Томбарлылар молодцы, кешенең йөрәгенә үтеп керерлек итеп итеп, оста итеп уйнадылар, бик ошады спектакль, еладык та, көлдек тә, – дип, тәэсирләре белән уртаклашты Баулыда яшәүче Люзия Галимова.

Тамашчылар күңелендә хисләр уята алу күп нәрсә турында сөйли.

“Спектакль бик ошады, бала тудыру йортында яткан чаклар искә төште. Томбарлылар бик оста, көлдерделәр дә, елаттылар да Баласыз хатынның: “Бала кирәк миңа, бала кирәк!”, – дип кычкыруы йөрәккә бәрде. Нәкъ шул вакытта утны да сүндереп алулары да тәэсир итте”. – дип сөйләде Кызылъярда туып, Миңнегол авылында яшәүче Гөлшат Фәрдиева. 

Спектакль тәмамлангач, тамашачылар үзешчән артистларны алкышларга күмделәр. Томбарлы авыл җирле башлыгы Айгөл Минәҗева да авылдашларының шулай спектакль куюларына сөенүен белдерде, үзешчән артистларны Мәдәният хезмәткәре көне белән котлады, Кызылъяр мәдәният йорты хезмәткәрләренә һөнәри бәйрәмнәре уңаеннан бүләк тапшырды. 

“Җирлек башлыгы нәкъ менә Айгөл Мөхәммәтовна кебек булырга тиештер. Ул безнең репетицияләрдә дә катнашты, машинасына арба тагып, безнең декорацияләрне төяп алып барды, бик зур рәхмәт аңа”, – дип сөйләде Айгөл Нәүрүзбаева. 

Кызылъяр мәдәният йорты директоры Ленир Дәүләтшин үзешчән артистларга авыл халкы исеменнән рәхмәт әйтте, һөнәри бәйрәмнәре белән котлады, бүләк тапшырды. 

“Томбарлы үзешчәннәренә бишле, алтылы, унлы билгесе дә куярга була, афәрин! – дип уртаклашты ул редакция хәбәрчесе белән. – Матур итеп, күмәкләшеп, күчтәнәчләр белән җыелышып килделәр, җиренә җиткереп уйнадылар, авыл халкының күңеленә хуш килде. Җирлек башлыгы белән күмәкләшеп башкаралар барлык эшләрен – декорацияләрен бергәләп ташыйлар, җыялар, сүтәләр. Гомумән, бу авыл мәдәният йорты белән җирлек башлыгы арасындагы мөнәсәбәтләр бик җылы. Спектакльләре дә матур, үзләре дә ачык йөзле, рәхәт кешеләр”.

Томбарлылар “Әниләр һәм бәбиләр” спектаклен “Театр язы” бәйгесенең жюри әгъзаларына узган атнада тәкъдим иттеләр. Бәйге нәтиҗәләре соңрак билгеле булачак.

Автор фотосы