Абунә лидерлары һәм аутсайдерлары турында

2012 елның икенче яртыеллыгына абунә нәтиҗәләре укучыларыбызны шәһәрдә күбрәк югалтуыбызны күрсәтте. Баулы-1 почта бүлекчәсендә (шәһәрнең түбән өлеше) язылучылар саны 18 процентка кимегән. Район участогы (РУПС) һәм Баулы-2 почта бүлекчәсендә ("кулаклар бистәсе"ндә) бу күрсәткеч 15 процентка төшкән.

Авыл почта бүлекчәләрендә абунә нәтиҗәләре төрле, бу исә аларның хезмәткәрләренең тырышлыгы һәм эшли белүенә турыдан-туры бәйле булуын раслый. Язылучылар санын саклап калу гына түгел, аны арттыручы бүлекчәләр дә бар ич. Иң яхшы күрсәткечләр Кырымсарай (119 процент), Татар Кандыз (113 процент), Поповка һәм Мортаза (105әр процент) почта бүлекчәләрендә. Алексеевка һәм Шалтыда шулай ук арту күзәтелә (102-104 процент). Гөлсәрия Ганиуллина, Гөлчирә Әхмәдиева, Светлана Базарова һәм Лилия Усманова җитәкчелеге астында эшләүче әлеге бүлекчәләр хезмәткәрләренә, авыл җирлеге башлыклары Елена Зелепугина, Мәхмүт Насыйбуллин, Сергей Попов, хуҗалык һәм бюджет учреждениеләре җитәкчеләренә булышлык күрсәтүләре һәм яхшы эшләре өчен зур рәхмәт белдерәсе килә.

Без иң начар нәтиҗәләр Потап-Томбарлы (78 процент), Васькин Туйралы (84 процент), Кызылъяр һәм Исергәптә (86ар процент) булыр дип көтмәгән идек. Без авыл җирлеге башлыклары Александр Килячков, Нәзирә Ярышева һәм Айдар Әһлиуллинга, почта бүлекчәләре начальниклары Әлфия Тимергалиева, Аселье Мөхәммәтшина, Зөлфирә Тәһаутдинова һәм Мөнирә Гыйльмановага абунәгә мөнәсәбәтләрен үзгәртүләрен һәм хәлне төзәтүләрен сорап мөрәҗәгать итәбез. Ахыр чиктә барысы кешеләр белән эшли белүгә кайтып кала. Яки эшли белмәүгә, теләк булмауга.

Районда "Хезмәткә дан" иң күп яздырылучы газета булып кала - язылу тиражын узган ел дәрәҗәсендә саклап булды. Ваклап сату һәм альтернатив абунәне исәпкә алмаганда, бу рус һәм татар телләрендә 3746 экземпляр дигән сүз. Безгә инде алга таба да укучыларыбызга дөрес һәм файдалы мәгълүмат җиткереп, җирле тормыш тарихын язарга кала.