Баулының актив өлкәннәре Фәнис Яруллин музеенда булды

Шушы көннәрдә музей-йорт ишекләре ябылып тормый. Бирегә Фәнис Яруллинның иҗатын яраткан һәркем, аның фаҗигале язмышын, тормыш юлын һәм иҗатын хәтерләрендә янәдән яңартыр өчен килә.

Күркәм музей-йорт әллә кайдан үзенә тартып тора, килеп керү белән нур бөркеп торган йорттан язучы үзе килеп чыгар да төсле тоела. Биредә аның рухы яши.

Музей-йорт хуҗалары һәркемне якты йөз белән каршы ала. Музей җитәкчесе Гүзәлия Газизуллина Фәнис Яруллинның тормыш юлы турында, тасвирлап, җентекләп, һәркемгә аңлаешлы итеп җиткерә. Экспонатлар ярдәмендә тормыш һәм иҗат юлы буенча тулы мәгълүмат алып була.

– Музейда беренче генә булуым, – ди Баулы муниципаль районының ветераннар советы рәисе Альбина Хәлиуллина. – Экскурсияне уздырган Гүзәлия Миргазиян кызының шул кадәр дә үтемле итеп сөйләве йөрәкләрдә калды. Хәтта күзләрдән яшьләр бәреп чыкты. Фәнис Яруллинның урын-җирен, костюмнарын, коляскасын күрү аеруча дулкынландыргыч булды.

Музейга килүчеләр экскурсия дәвамында хатирәләре белән бүлеште, кызыксынган сорауларын бирде.  

Көн саен диярлек музейга кеше агыла, хәтта күрше районнардан килүчеләр бар.

Автор фотолары.