Хәнсевәр авылында өмәгә чыктылар

Карлар эрү белән чүп-чар күпләп чыга. Авыл һәм шәһәр халкы шулай ук якын- тирәдә үскән корыган агач ботакларын кисү, көздән коелган агач яфраклары җыю, корыган үләннәрне тырмалау эшләре белән мәшгуль. 
– Өмәләрнең ел әйләнәсе дә туктап торганы юк инде. Башта язгы өмәләр, аннары мәдәният йорты тирәсенә чәчәкләр утыртабыз. Җәй дәвамында аларны карап торырга, утарга, су сибәргә кирәк, – дип сөйләде мәдәният йорты директоры Рәмзия Таҗетдинова. – Чираттагы өмәбез дә бик күңелле үтте. Безгә авыл яшьләре дә кушылды. Мәдәният йортының тирә-ягын гына түгел, эчке якларында да җыештыру, юу эшләрен оештырдык. Бергә булгач, күңелле дә, эш тә тиз башкарыла. 
Өмә барышында мәдәният йорты тирәсендәге асфальт юлларны себереп тә куйганнар, тиздән чәчәкләр утыртырга дип клумбаларны да казып, йомшартып куйганнар.