Татар Кандызы авылында ел саен Карга боткасы пешә

Татар Кандызы авылында Карга боткасын пешерергә алдан ук әзерлек башлана. Чараны оештыручы Сиринә Вәгыйзова сүзләренчә, алар балалар белән бергәләп, тәмле Карга боткасы әзерләү өчен өй саен йөреп төрле ярмалар, йомыркалар, тәм-том җыеп йөриләр. 
– Борынгыдан халык телендә йөргән матур такмакларны да балалар белән кабатлыйбыз, өйләргә йөреп шуларны хуҗаларга да ишеттерәбез, – дип сөйләде Сиринә ханым. – Карга боткасы пешерергә әзерләнгәндә түбәндәге такмакны әйтәбез:
Өйдәме түтәй?
Тизрәк бир күкәй.
Бирсәң безгә өч күкәй,
Тавыгың салыр йөз күкәй.
Май кирәк, ярма кирәк,
Карга туена бар да кирәк.
Шикәр кирәк, тоз кирәк,
Чыгар, түтәй, тизрәк.
Синең кебек уңган түтәй
Бу дөньяда бик сирәк. Шуны барыбыз бергә кабатлап, хуҗаларга рәхмәтләр әйтеп, бәйрәмебезгә күчтәнәчләр җыела. Авыл халкы киң күңелле бит ул. Балаларның Карга боткасына әзерләнүен күреп, алар да күчтәнәчләрен алдан алып куялар. Ботка пешкәч, үзләре дә бәйрәмгә киләләр. Килә алмаганнарына күчтәнәчләр кертеп чыгабыз. 
Оештыручылар әйтүенчә, Карга боткасы пешкән арада балалар төрле уеннар уйныйлар, ярышалар, көч сынашалар. Бәйрәмгә килүчеләргә Карга боткасы пешерү тарихы турында сөйлиләр. Шулай итеп, борынгы бәйрәм һәм йолалар буыннан буынга күчеп килә.