Баулы мәчетләрендә балалар сәламәтләндерү курслары үтә

– Август аенда оештырылган сәламәтләндерү курсларына 25 ир бала һәм егермеләп кыз бала килде, – дип хәбәр итте Баулы имам-мөхтәсибе Әнвәр Хәмитов. – Ир балалар белән күбрәк Рәсим хәзрәт Садыков шөгыльләнде, шулай ук аңа Әлмәт мәдрәсәсенең өченче курста укучы Салих исемле шәкерт ярдәм итте. Ә кызлар өчен Алсу Зыязова, Светлана Ханипова дәресләр уздырдылар, уеннар һәм ял сәгатьләре оештырдылар.
Мөхтәсибәт хәбәр иткәнчә, мондый сәламәтләндерү курслары балалар өчен кызыклы да, файдалы да итеп оештырыла. Бер килгән балалар кабат шул ук курсларга килү теләге белдерә.
– Сәламәтләндерү курслары җиде көнгә исәпләнгән. Балалар иртәнге тугыздан алып, көндезге бергә кадәр биредә, – ди Әнвәр хәзрәт. – Алар шул вакыт эчендә җәй башында узган лагерьдә өйрәнгән хәрефләрне яңадан кабатлап, өйрәнгән сүрәләрне искә төшерделәр, ныгыттылар. Аннан тыш балаларга төрле мастер-класслар оештырылды. Алар үз куллары белән әти- әниләренә, якыннарына бүләкләр дә ясарга өйрәнделәр. Малайлар мәчет янындагы зур стадионга футбол уйнарга да йөрделәр. 
Мәчет яны курсларына йөрүче балалар бер тапкыр кайнар аш белән тәэмин ителгән. Кайтып киткәндә дә кулларына күчтәнәч биреп озатканнар.