Яңа Шалты авылында Мәүлид бәйрәме узды

Һәр мөселман кешесе өчен пәйгамбәребез туган көн – зур бәйрәм. Бу көнне мәчетләрдә, һәр йортта бәйрәм рухы сизелә. Шалты мәчетенә килүчеләр пәйгамбәребезне зурлап, догалар укыдылар, салават әйттеләр. Авыл имамы Әсгать Мәхмүт улы вәгазьләр укыды.  

– Соңгы елларда мәчетебезнең ишекләре ябылып торганы юк, – ди ветеран укытучы Наҗия Гыйльфанова. – Мәктәп укучыларының, авылыбыз яшьләренең мәчеттә уздырган чараларда теләп һәм актив катнашуларына бик шатмын.  Бик күңелле. Балаларда динебезгә караш өлкәннәр аша килә бит. Мәсәлән, авылыбызның хөрмәтле кешеләренең берсе, хаҗиябез Римма Фатих кызының да балаларга дини тәрбиясе һәм йогынтысы зур булды.  

Шалтылы Наҗия Гыйльфанова мәктәп укучыларына мөнәҗәтләр дә өйрәткән. Малайлар һәм кызларның ярыша-ярыша мөнәҗәт укулары өлкәннәр күңеленә сары май кебек булды. Алар киләчәктә дә авыл балаларын шул юнәлештә тәрбия итәргә кирәклеген әйтеп, мөгаллимәләргә рәхмәт җиткерделәр.