Мортазада хәрбиләрнең якыннары Карга боткасына җыелды

Чараны авыл китапханәсе һәм авыл клубы хезмәткәрләре берлектә әзерләделәр. Нәүрүз бәйрәме күңелле җырлар, нәфис сүз белән башланып китте. Шулай ук Нәүрүз тарихы турында да сөйләделәр.

– Нәүрүз – яз аеның көн белән төн тигезләшкән көнендә билгеләп үтелә, борынгы төрки халыкларның кояш календаре буенча Яңа ел бәйрәме ул, – диде чараны оештыручы Мортаза авылы китапханәчесе Илзия Латыпова. – Нәүрүз бәйрәме язны каршылап, язгы чәчү эшләре алдыннан үткәрелә торган халык бәйрәме, дуслык һәм игелек бәйрәме.

Чарага килгән кунакларны Кырымсарай авыл җирлеге башлыгы Дамир Шакирҗанов та бәйрәм белән котлады. Котлау сүзләреннән соң, бәйрәм кичәсе җыр һәм бию белән үрелеп барды. Чарага килгән кунаклар татар милли уеннарында, төрле кызыклы конкурсларда катнашып күңел ачтылар.

Нәүрүз бәйрәме “Карга” боткасыннан башка булмый. Бу юлы да һәр кеше тәмле боткадан авыз иттеләр, чәй табыны артында бергәләшеп кайнар чәй эчтеләр.

– Рамазан ае булу сәбәпле, ураза тотучы кунакларыбызны да буш кул белән җибәрмәдек, – дип сөйләде Илзия Латыпова. – Кич белән авыз ачканда Карга боткасыннан авыз итәр өчен контейнер савытларга салып биреп җибәрдек.

– Бәйрәмне оештыручыларга, безне чакырганнары өчен зур рәхмәт, – дип оештыручыларга рәхмәт сүзләрен җиткерде Нәсим Гәрәев. Бүгенге көндә аның бертуган энесе махсус хәрби операция зонасында. – Күңел ачтык, борынгы уеннар искә төште, матур җырлар тыңладык.

Бәйрәм тәмам булгач та, авыл халкы таралырга ашыкмады, дөнья хәлләрен сөйләшеп, бәйрәмне оештыручыларга кат-кат рәхмәтләр әйттеләр.