Баулы хуҗабикәләренә тиз әзерләнә торган салат рецепты

Ингредиентлар:

• Руккола – 1 зур бәйләм (сусыл, үзенчәлекле тәм килеп торган яшеллек);

• Кызыл һәм сары помидорлар – 3-4әр данә (яки бер уч төрле төстәге “черри” помидорлары);

• Фета сыры (тозлыксыз) – 100-150 г.

Үзенчәлекле соус өчен:

• Соя соусы – 1,5-2 аш кашыгы;

• Үсемлек мае (зәйтүн мае булса яхшырак, көнбагыш мае да ярый) – 3 аш кашыгы;

• Төелгән кара борыч – тәменчә.

Игътибар итегез: бу салатка тоз салырга кирәкми! Соя соусы белән Фета сыры салатка җитәрлек дәрәҗәдә тоз бирә.

Әзерләү тәртибе:

1. Рукколаны салкын суда яхшылап юабыз һәм кәгазь салфеткада киптерәбез (артык су соусның тәмен бозмасын өчен бу бик мөһим). Яшеллекне матур яссы тәлинкәгә нигез итеп җәябез.

2. Помидорларны эре кисәкләп турыйбыз (черри куллансагыз, урталай гына бүлегез). Кызыл һәм сары помидорлар салатны тагын да күркәмрәк һәм аппетитны ача торган итә. Аларны руккола өстенә тезеп чыгабыз.

3. Соус әзерлибез. Кечкенә савытта үсемлек мае белән соя соусын кушабыз, бер чеметем кара борыч өстибез. Барысын бергә яхшылап болгатабыз  һәм салат өстенә тигез итеп сибәбез.

5. Иң өскә шакмаклап туралган йомшак Фета сырын куябыз.

Тәмле, җиңел һәм файдалы салатыбыз әзер! Ул ит ризыклары янына өстәмә буларак та, кичке ашка җиңелчә капкалап алу өчен дә туры килеп тора. Тәмле булсын!

Хөрмәтле баулылар! Табыныгызны нинди ризыклар бизи? Безнең белән дә уртаклашыгыз әле. Рецептларны һәм фотосурәтләрне редакциягә (Баулы, Пионер урамы, 9) китереп бирергә, 89178745619  (ватсап, макс) номерына яисә электрон адреска (saet77@mail.ru)  җибәрергә була.

Фото: Ләйсән Сәетгәрәева