WhatsApр төркемнәренә кешеләр туплауда үзгәрешләр бар

Һиндстанда балаларны урлау турындагы гайбәтләр аркасында үз-үзләрен хөкем итүчеләр булган. Мессенджерда таралган фотодагы җинаятьчегә охшаган кешеләргә урамда һөҗүм иткәннәр. Гаепсез кешеләр һәлак булган. Шуннан соң Һиндстан хөкүмәте WhatsApp мессенджерына катгый таләп куйган, ялган мәгълүмат таратуны чикләүне сораган булган.

Шуннан соң WhatsApp мессенджеры чикләүләр кертә башлады. Элек бер хәбәрне 250 кешегә тапшырып булса, бу сан егерме белән чикләнде.  Соңрак исә бишкә генә калды.

Инде менә яңа чикләү игълан ителде. Кешене WhatsApp та яңа төркемгә кушу өчен аннан ризалык алу таләп ителәчәк. Теләсә кем башка кешеләрне җыеп төркемгә кертә алмаячак.

Төркемгә кертү турында сорау җибәрәсең, ул рөхсәт итсә, төркемгә керү турында ризалык бирсә, аңа хәбәрләр килә башлый.

Моңа кадәр кешене төркемгә кушу өчен рөхсәт сорыйсы юк иде. Номерын өстисең дә, кертәсең. Шуннан соң бу кешегә хәбәрләр китә башлый. Хәзер исә кешене төркемгә кушу өчен, башта аннан рөхсәт сорарга кирәк була, диелгән әлеге хәбәрдә.

 WhatsApp мессенджерын дөньяда 1,5 млрд чамасы кеше куллана.

Бу хакта тулырак: https://intertat.tatar/copayjavap/whatsapr-t-rkemn-ren-keshel-r-tuplauda-zg-reshl-r-bar/

Фото https://pixabay.com