Магнит йоткан бала үлемнән чак калган

Иркутск өлкә балалар клиник дәваханәсендә магнит шарлары йоткан бер яшьлек баланы коткарып калганнар. Бу хакта “IrkutskMedia” басмасы хәбәр итә.

Металл әйберләр эчәклеккә шулкадәр зыян китергән, хәтта анда тишекләр барлыкка килгән.

"Баланың әнисе яшәү урыны буенча поликлиникага мөрәҗәгать иткән. Сабыйның температурасы күтәрелгән булган. Аңа рентген ясаганнар һәм көтмәгәндә табиблар түгәрәк әйберләрдән тезелгән чылбырны күргән. Баланы ашыгыч рәвештә дәваханәгә салганнар, ә аннары тиз арада операция ясаганнар", – диелә хәбәрдә.

Балалар хирургы Ирина Кайгородова билгеләп үткәнчә, бала шарларны берәмләп йоткан, әмма алар эчтә бер-берсенә тартылган, шуның аркасында ялкынсыну процессы башланган.

"Операция катлаулы булды, озакка сузу коточкыч нәтиҗәгә китерергә мөмкин иде. Хәзер баланы реанимациядән хирургия бүлегенә күчерергә әзерлибез", - дип белдерә табиб.

Фото: pixabay.com

Чыганак