Баулыда яшьләр туй көннәрендә музейга баралар

Бу традиция яңа өйләнешүчеләр арасында популярлык ала бара. Узган җомгада музей кунаклары Альбина һәм Равил Гаязовалар булган. Алар туганнары белән бергә туган як гореф-гадәтләре, район үсеше тарихы белән якыннанрак танышканнар, җанланып киткән экспонатның скрипка көен тыңлаганнар, 100 еллык самовардан чәй эчкәннәр. Яшь пар өчен шулай ук сюрпризлы бәйгеләр дә оештырылган. Ә ахырдан кәләш белән кияү традицион тәкъдимнәр һәм теләкләр китабында язма калдырганнар.