Сентябрь аенда Татарстанда ОРВИ һәм коронавирус белән авыручыларның артуы көтелә

Көзен Татарстанда ОРВИ, шул исәптән яңа төрдәге Covid-19 коронавирус инфекциясе белән авыручыларның артуы көтелә.

Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе урынбасары Любовь Авдонина «Татар-информ» агентлыгында узган матбугат конференциясендә шулай дип белдерде.

«Бездә коронавирус инфекциясен йоктыручылар саны былтыр ике тапкыр артты: беренчесе — май аена, икенчесе октябрьгә туры килде. ОРВИ сезоны булганлыктан, бу көтелгән хәл иде. Без сентябрь аенда янә авыручылар саны артыр дип көтәбез», — дип искәртте спикер.

Роспотребнадзорда билгеләп үтүләренчә, Татарстанда яшәүчеләр Covid-19 таралу аркасында кертелгән барлык санитар-эпидемиологик кагыйдәләрне үтәвен дәвам иткән очракта, яз айларында коронавирус инфекциясен йоктыручылар саны артмас дигән өмет бар.

Фото: /pixabay.com

Чыганак:  https://tatar-inform.tatar/news/health/26-03-2021/sentyabr-aenda-tatarstanda-orvi-m-koronavirus-bel-n-avyruchylarny-artuy-k-tel-5815368