Республикада грипп һәм ОРВИ белән авыру очраклары буенча хәл тотрыклы. Дөрес, яңа ел бәйрәмнәрендә 6 мең кеше авыртса, яллар узып, зурлар эшкә, кечкенәләр мәктәп, балалар бакчасына йөри башлагач, 13 меңгә якын очрак теркәлгән. Бу эпидемия бусагасыннан 17,2 процентка түбәнрәк. Шулай да республика сәламәтлек саклау министрының беренче урынбасары Сергей Осипов бер атна эчендә авыру очраклары ике тапкыр артуга бармак аша карамаска киңәш итә. Ул грипптан саклану чаралары хакында тагын бер кат искә төшерә.
