Районда малларны кышлатырга узган елгы азык запасы ярдәм итәчәк

Авыл хуҗалыгы белгечләре мәгьлүматларына караганда, кышны чыгар өчен бер шартлы мал башына норма буенча утыз центнердан артык  азык әзерләргә кирәк.

– Күпъеллык үләннәрнең алты меңнән артык гектары чабылган, – дип сөйләде районның авыл хуҗалыгы һәм азык-төлек идарәсе начальнигы Альберт Талипов. – 3100 гектары печәнгә, 3200 гектары сенажга чабылган. 7520 тонна печән (узган ел белән чагыштырганда 53%), 16 800 тонна сенаж әзерләнгән. Шулай ук узган елдан калган 10,7 центнер (бер мал башына) азык берәмлеге бар. Өстәмә рәвештә быел якынча 15 центнер азык берәмлеге әзерләү планлаштырыла. Бу якынча 25, 8 мең тонна сенаж, 30 мең тонна силос, 24, 5 мең тонна салам һәм печән дигән сүз.