Җәйге лагерьга җибәргәндә балага нәрсәләр бирергә ярамый?

Роспотребнадзор балаларны җәйге лагерьга озаткан әти-әниләргә киңәшләр бирде.

Балага киемнәрне 21 көнгә җитәрлек итеп әзерләгез. Үзләре белән соклар, лимонад, пирожныйлар, тиз әзерләнә торган токмач бирмәгез. Шулай ук чемоданга баллы ризыклар, тиз бозыла торган әйберләр тутырмагыз.

Балаларга консервалар, гөмбәләр, кремлы пирожныйлар, итле һәм балыклы ризыклар, өйдә әзерләнгән ризык та бирергә ярамый.

Шулай ук бала лагерьга барганда, аның белән кыйммәтле техника да бирмәү хәерле. Чөнки аның югалуы бар. Парфюмерия-косметика чараларын да алып бармау киңәш ителә. Бу башка балаларда аллергия китереп чыгарырга мөмкин.

Тыелган әйберләр исемлегенә тәмәке, алкоголь, нунчаклар, кастетлар, лазерлы күрсәткечләр, бейсбол биталары, дарулар, газлы баллончыклар һәм башка төрле шәхси саклану чаралары керә.

Балага теш щеткасы, пляж һәм мунча өчен аерым тастымаллар бирергә онытмагыз. Рюкзакта литр ярымлы шешә белән су булу яхшы.

Фото: /pixabay.com

Чыганак: https://intertat.tatar/news/questions_answers/16-07-2020/yge-lagerga-ib-rg-nd-balaga-n-rs-l-r-birerg-yaramyy-5756538