Авырулардан шифалы эчемлек

Көзге салкыннар, йогышлы авырулар таралган вакытта өйдә әзерләнгән имбир эчемлеге ярдәмгә килә. 

Эчемлек өчен кирәкле әйберләрне һәр кибеттә сатып алырга була, әзерләү 3-5 минут вакытны ала. Бу файдалы катнашманы банкага салып, өйдә сакларга һәм эштә дә кулланырга мөмкин.

Бу катнашманы әзерләү өчен 1 лимон, 1 имбир тамыры, бал һәм блендер кирәк булачак. Лимонны, имбир тамырын блендерда ваклап яисә иттарткычтан үткәреп, шуңа 3 аш кашыгы бал салып болгатырга. Балның файдасы турында сөйләп торасы да юк. Катнашманы ачымасын өчен суыткычта саклау яхшырак.

Аны ничек кулланырга, дисезме? Чынаякка 2-3 чәй калагы шул катнашманы саласыз, өстенә кайнар су коясыз, кирәк булса, тагын бал өстисез һәм тәмләп эчәсез. Лимонадны хәтерләтүче, аз гына әчкелтем тәме булган бу татлы эчемлек бик шифалы.