Татар Томбарлысы авылында язгы өмәләр дәвам итә

Татар Томбарлысы авылына килеп керү белән урамнарның чиста итеп җыештырылганына, узган елгы корыган үләннәрнең пөхтә итеп тырмап куелуына игътибар итәсең.

– Без көн саен иртәнге якта чүп-чар җыярга чыгабыз. Чиста булса, үзебезгә дә күңелле, – дип сөйләде авыл китапханәсендә эшләүче Эльвира Әхмәтҗанова. – Башта кар ачылу белән чыккан эре чүпләрне җыйдык, әле җир бераз җилләде инде, корыган үләннәрне тырмап җыябыз. Чүпләрне авыл башыннан ук җыеп киләбез. Чүп-чар күп.

Өмәдә катнашучылар сүзләренчә, язгы өмәләргә авыл халкы бик кушылмый, гадәттә, бюджет өлкәсендә эшләүчеләр чыгып эшли.

– Авылда шулай ук хуҗалары читтә яшәгән йортлар бар. Андый йортларның тирә-ягын җыештыру да безгә кала, – ди өмәчеләр. – Ә урамнарны матурлыйсы, чистартасы килә. Авылның чисталыгы үзебездән тора.

Шушы көннәрдә өмәдә катнашучылар юл буйларын, авыл урамнарын, обелиск, мәдәният йорты тирәсендәге чүп-чарны җыйганнар.

Фото: Индира Сәйфуллина