Данияр Бакиров: “Татарстанда контрактчыларга түләү күбрәк”

Баулы шәһәре, Баулы һәм Ютазы районнары хәрби комиссариаты, район администрациясе халыкка контракт хезмәте турында хәбәр итү эшен даими алып бара.
– Гыйнвардан июньгә кадәр Баулы районында контракт хезмәте турында мәгълүмат язылган якынча 15 мең листовка бастырылды һәм таратылды, – дип билгеләп үтте Баулы районы башкарма комитеты җитәкчесе Данияр Бакиров. – Баннерларга килгәндә, ел башыннан 9 баннер урнаштырдык. Баулыларга контракт хезмәте турында мәгълүмат бирү эше көн саен алып барыла: Баулы һәм Ютазы районнары хәрби комиссариаты белән берлектә, предприятие һәм оешмалар коллективлары белән очрашабыз. Шулай ук авыл җирлекләрендә яшәүчеләр белән дә очрашып торабыз, халыкның сорауларына җавап бирәбез. Мәгълүматны авыл җирлекләре башлыклары аша да җиткерәбез. Шулай ук барлык сәүдә объектларында, предприятиеләрдә мәгълүмат листовкалары бар.
Баулылар арасында, контракт хезмәте белән кызыксынып, хәрби комиссариатка мөрәҗәгать итүчеләр бар.
– Кешеләр хәрби комиссариатка килә, кызыксына. Беркем өчен дә сер түгел: атнага 5-6 кеше медицина комиссиясе үтә һәм киләчәктә контракт хезмәтенә китә, – дип хәбәр итте Данияр Бакиров. – Шулай ук күрше төбәкләр белән эш алып барыла, чөнки күпчелек очракта Татарстан Республикасында түләүләр күрше төбәкләргә караганда күбрәк. Безгә күршеләребез дә килә. Баннерларны Башкортстан Республикасында да урнаштырдык, Оренбург өлкәсендә листовкалар тараттык. Бу арада гына дүрт бригада ике юнәлеш буенча листовкалар тарату эшенә китте – Башкортстан Республикасы һәм Оренбург өлкәсенә. Шулай ук бездә яшьләр бүлеге һәм IT-бүлек бар, алар социаль челтәрләрдә агитация урнаштыралар. Бу безнең район буенча гына түгел, алар бу мәгълүматны күрше төбәкләргә дә җиткерәләр.
Район башкарма комитеты җитәкчесе белән аралашканнан соң, Баулы урамнарын әйләнеп чыктык. Шәһәр эчендә контракт хезмәте турында мәгълүмат язылган билбордлар һәм баннерлар куелганлыгын күрдек. Аерым алганда, щитларда 117 номеры күрсәтелгән, әлеге номерга шалтыратып, контракт хезмәте турындагы барлык сорауларны бирергә була. Моннан тыш, билбордларда җирле номерлар һәм түләүләр турында мәгълүмат та бар.
Контракт хезмәте турында мәгълүматны күпфатирлы йортларның подъездларында һәм сәүдә объектларында да табарга мөмкин. Зур челтәр кибетләренә керү урынында контракт хезмәте турында тулы мәгълүмат белән листовкалар эленгән, аларда телефон номерлары да күрсәтелгән. 
 – Бездә контракт хезмәте турында мәгълүмат буклетлары һәм листовкалар бар. Листовкалар керү зонасында эленеп тора. Сатып алучылар өстәлләрендә буклетлар бар, – дип билгеләп үтте бер кибет директоры.
Без шәһәр урамнарында сораштыру да үткәрдек: баулыларның контракт хезмәте һәм махсус хәрби операция зонасына киткән кешеләр турында хәбәрдар булу-булмауларын сораштык.
 – Хәзер бит бөтен җирдә реклама, баннерлар эленеп тора, әлбәттә, контракт хезмәте турында беләбез. Күптән түгел генә телевизордан ишеттем: контрактчыларга түләүләр суммасын күтәргәннәр, – дип җавап бирде бер әңгәмәдәшебез.
– Минем танышларым анда хезмәт итә, алар мобилизация буенча киттеләр. Контракт төзү – һәр кешенең үз теләге. Минемчә, Ватаныбызны сакларга кирәк, – дип билгеләп үтте бер ир-егет.
Хәрби комиссариат янында без бер ир-егетне очраттык, ул контрактчы булып чыкты.
– Мин контракт хезмәте турында мәгълүмат листовкаларыннан белдем. 2023 елның декабреннән бирле махсус хәрби операция зонасында хезмәт итәм. Хәзерге вакытта,  яраланганнан соң, туган шәһәремдә реабилитация узам, – дип җавап бирде ул.
Тулырак мәгълүматны Баулы шәһәре, Баулы һәм Ютазы районнарының хәрби комиссариатына шалтыратып белергә була