Көлтә бәйрәме тарихны яңартты

Татар Кандызы авылы мәдәният йорты хезмәткәрләре төрледән-төрле чаралар оештырып тора. Алар арасында тарихи, милли йолаларга багышланганнары да байтак. Бу юлы алар, басуга чыгып, беренче көлтә бәйрәмен уздырдылар.

Чараны оештыручылар крестьяннар тормышы, кул көче белән җир эшкәрткән вакытларны, шул чорның эш кораллары хакында сөйләделәр.

– Борынгы йолаларга нигезләнгән бәйрәмнәр оештырыр алдыннан, авылыбызның өлкән кешеләре белән очрашабыз, алардан шул йола һәм хезмәтләр хакында сөйләтеп, мәгълүмат җыябыз. Бу юлы да шулай иттек. Чөнки безнең төп максатыбыз – үсеп килүче буынга милли традиция, гореф-гадәт һәм йолалар хакында сөйләп, күрсәтеп калдыру. Көлтә бәйрәме дә шуны күздә тотып оештырылды, – дип сөйләде Татар Кандызы мәдәният йорты режиссеры Луиза Шакирова. 

Чарада катнашучылар, милли киемнәр киеп, бер генә мизгелгә элекке чорның урак белән башак кисүчеләренә һәм көлтә бәйләүчеләренә әверелделәр.

– Урып-җыю вакыты – иң авыр чор. Без инде күптәннән бу зур хезмәтне комбайнчыларга тапшырдык. Ә бүген тарихка әйләнеп кайттык, – дип сөйләде чарада катнашучы, авыл активы Ләйсән Галимҗанова. – Һәр көлтәдән икмәк исе аңкый. Икмәк бит – муллык, туклык билгесе. Уңышны җыеп алу күпме көч таләп итүен безнең буын яхшы белә, яхшы хәтерли. Шуңа күрә аның бөртеген дә югалтмыйча җыеп алырга тырышалар. Кабатлап әйтәм, бүген басу-кырларда көчле һәм заманча техника эшли. Ә без кечкенә чакта болар барысы да кул көче белән эшләнә иде.

Чарада катнашучылар үзләренең кечкенә вакыттагы истәлекләре, балачак хатирәләре белән уртаклаштылар. Беренче көлтә бәйрәме шул теманы чагылдырган җырлар, уеннар һәм сынамышлар белән үрелеп барды.