Людмила Егорова авылны сайлаган

Покров Урыстамак авылы мәдәният йортында мәдәни тормыш кайный. Биредә балалар һәм өлкәннәр өчен төрле түгәрәкләр уңышлы эшләп килә, халык өчен төрле чаралар үткәрелә. Мәдәният йорты – Баулы районы удмуртларының милли-мәдәни үзәге. Монда кайчандыр «Зардон» халык фольклор ансамбле барлыкка килгән, удмурт халык театры эшли. Җирле үзешчәннәр район һәм республика чараларында даими катнашалар, төрле конкурс һәм фестивальләрдә призерлар булалар.
Авылның мәдәният йорты традицион «Баулы пилмәне» гастрофестивален оештыручы булып тора, тугыз ел рәттән мәдәният йорты базасында удмуртларның «Мударвай» төбәкара балалар конкурсының район этабы уза, ә узган елдан коллектив традицион «Гершыд» бәйрәмен үткәрә.
Мәдәният йорты директоры Наталья Зәйдуллина сүзләренә караганда, биредә шулай ук халык мәдәниятен, телен, гореф-гадәтләрен саклау буенча зур эшләр алып барыла. Балаларны бәйрәмнәр, традицияләр, һөнәрләр, удмурт халык уеннары белән таныштыралар.
Людмила Егорова мәдәният йортының дус һәм хезмәт сөючән коллективының алыштыргысыз өлеше булып тора. Тумышы белән Башкортстан авылыннан. Ул 1997 елда Покров Урыстамак авылына кияүгә чыга һәм гаилә авылда яшәп кала. Авыл мәдәният йортына ун ел элек килгән, аның тумыштан килгән сәләтен күреп, Наталья Зәйдуллина эшкә чакырган.  Шулай итеп, Людмила мәдәният өлкәсендә үз юлын хормейстердан башлый, соңрак Алабуга мәдәният көллиятен тәмамлый. Хәзер ул «Солнышко» балалар вокаль ансамбленең җитәкчесе – коллектив составына кече сыйныфтан алып җиденче сыйныфка кадәр унике бала керә.

– Балалар белән эшләү бик ошый, без алар белән заманча балалар җырларын өйрәнәбез, җырлыйбыз, районның төрле чараларында чыгышлар ясыйбыз. Кайбер вокалистлар район фестивальләрендә һәм конкурсларында даими призлы урыннар яулыйлар, – дип сөйләде ул.
Людмила “Ивушка” вокаль ансамблен дә җитәкли. Анысы өлкәннәр өчен. Аларның репертуарында – рус җырлары. Коллектив составында ун кеше, нигездә, алар авыл чараларында чыгыш ясыйлар.

Людмила мәдәният йортында эшли башлаганнан бирле «Зардон» халык фольклор ансамбле составында җырлый, аның җитәкчесе Наталья Семёновна. Безнең героинябыз шулай ук ялгыз чыгышлар да ясый, дөресен генә әйткәндә, ул барыннан да бигрәк 90нчы еллар җырларын башкаруны өстен күрә.

– Минем эшем бик кызыклы, бай эчтәлекле, шуның өчен мин эшемне яратам. Монда үземне, үз сәләтемне таптым дип әйтергә була, – дип уртаклаша ул. – Әйе, әлбәттә, һәр эшнең үз кыенлыклары була. Мәшәкатьләр бигрәк тә масштаблы чараларга әзерләнгәндә күзәтелә. Уйланылган чаралар, бәйрәмнәр яхшы итеп узып киткәч, барлык борчылулар артта кала. Без һәрвакыт чыгышлар ясап торабыз, башкаларның чыгышларын карыйбыз, үзебезне күрсәтәбез, аралашабыз, тәҗрибә туплыйбыз.

Ә ни өчен ул авылны сайлаган дигән сорауга Людмила гади генә җавап бирә:

– Шәһәр тормышы миңа таныш та түгел. Авылда уңайлырак, тынычрак, шуңа күрә монда тормыш иптәшем белән яшәргә калдык. Ул машина йөртүче булып эшли, ә мин мәдәнияткә хезмәт итәм, – ди ул. – Без алты бала үстердек, хәзер инде олы кызыбызга 27 яшь, ә кечесе тугызынчы сыйныфта укый.
Людмила күптән түгел генә яңа һөнәр дә үзләштергән. Ул станокта туку серләрен өйрәнгән. Борынгыча яклы туку станогы – күптән түгел мәдәният йорты директоры Наталья Зәйдуллина инициативасы белән сатып алынган.

– Мондый мини-станок сатып алу нияте күптән бар иде инде. Бу зур, тулы станок түгел, әмма үз функцияләрен яхшы башкара. Мәсәлән, анда 70 сантиметр киңлектәге юлларны тыныч кына тукырга була. Хәзер инде андый станокларда беркем дә эшләми, авылда моны хәтерләүче картлар да юк. Без балаларны да моңа җәлеп итәргә, аларны бераз булса да туку нигезләренә өйрәтергә, нәрсә икәнен сөйләргә, туку алымнарын, ничек тукуларын күрсәтергә теләдек, – дип уртаклаша Наталья Семёновна. – Балаларыбыз мәдәниятебез белән танышып үссеннәр иде. Безнең бу юнәлештә бер тәҗрибәбез дә булмады, шуңа күрә бу эш буенча мастер-класс үттек. Үз эшебезне иске әйберләрдән башладык һәм менә тукыйбыз.

Людмила Егорова зур кызыксыну һәм дәрт белән әби-бабаларының һөнәренә өйрәнгән. Мәдәният йорты директоры белән алар инде әзер тукымаларны, тукыган юлларны күрсәтәләр.

– Бу эшләнмәне балалар да тукырга булыштылар, шулай ук без үзебез дә тырыштык. Ул бик матур килеп чыкты. Андый станоклар хәзер юк инде, әмма балаларга безнең бабайлар һәм әбиләрнең нинди кул эшләре белән шөгыльләнгәнен сөйләп күрсәтү мөһим. Өстәвенә, мондый шөгыль бик файдалы, кулларның вак моторикасын үстерә. Балалар түгәрәкләргә килгәндә дә станокта эшләргә теләүләрен әйтәләр. Без бик теләп аларга күрсәтәбез, өйрәтәбез, – ди Людмила.

Мәдәният хезмәткәрләренең планнары зур. Киләчәктә алар йон һәм юкарак җепләрдән эшләнмәләр тукуны оештырырга уйлыйлар. Ә әлегә борынгы туку эшендә беренче адымнарын ясыйлар, беренче уңышларын күрсәтәләр.