Шагыйрь Рәшит Әхмәтҗановны туган авылында искә алдылар

Кичәне Кандыз авылының китапханә мөдире Гөлнур Насибуллина һәм тарих, җәмгыять белеме укытучысы Роза Әхмәтҗанова оештырды.

Сәхнә бәйрәмчә бизәлгән иде, искә алу кичәсе җыр һәм шигырьләр белән үрелеп барды, дип хәбәр итә авыл мәктәбе директоры Илшат Хәлиуллин.

Кандызның үзешчән артистлары Рәшит Әхмәтҗанов шигырьләренә иҗат ителгән җырлар башкарды, укучылар аның шигырьләрен сөйләп тамашачыны шатландырды. Ә инде Баулы шәһәреннән килгән Татарстанның атказанган мәдәният хезмәткәре, җырчы Саҗидә Әхмәтҗанованың һәм баянчы Зәйтүн Муллаяновның чыгышы бәйрәмне тагын да ямьләндереп җибәрде.

Атаклы татар шагыйренең туганыннан туганы Сәгыйть Әхмәтҗанов аңа атап язган шигырен укыды һәм җырлар башкарды. Аның турында хәтирәләр белән уртаклашты.

Кичәнең ахырында ТНВ каналы тарафыннан төшерелгән Рәшит Әхмәтҗанов иҗатына багышланган фильм күрсәтелде.

«Кичә бик матур узды, барлык тамашачыларның күңелләренә хуш килде.

Кичәне оештыручыларга һәм барлык катнашучы укытучы, укучы, килгән артистларга бик зур рәхмәт!» - дип яза социаль челтәрендәге «Кандыздан без!» төркемендә Илшат Хәлиуллин.

Фото: vk.com