Матурлык кемгә комачаулый?

Күптән түгел “Хезмәткә дан”да шәһәрнең төньяк-көнбатыш өлешендәге спорт мәйданчыгының коймаларын кисүләре турында хәбәр итте. Һәм менә вандаллыкның тагын бер очрагы күзәтелгән. Билгесез кешеләр Октябрь мәйданында һәм “Колокольчик” балалар бакчасы янындагы паркта фонарьларны ватканнар. Кайбер яктырткычларның пыялалары коелган, төбе-тамыры белән йолкып алынганнары да бар. Бу уңайдан без шәһәрне төзекләндерү һәм яшелләндерү идарәсенең баш инженеры Вадим Шәрифуллин белән сөйләшеп алдык.

– Мәйданда вандаллыкның беренче генә очрагы түгел бу. Плиталарга корып ясалган фонарьларны гел ватып торалар. Кемгә генә комачаулый икән алар? – ди ул. –  Шәһәрлеләрнең уңайлыгы һәм иминлеге өчен булдырылган матурлыкка сак карашта булсак иде. Моны бәяләп бетермәүчеләрга җәза биреләчәк, чөнки әлеге ял урыннарында видеокүзәтү камералары куелган.

Вадим Шәрифуллин сүзләренә караганда, “җимерүчеләр” балалар мәйданчыклары яныннан да тыныч кына уза алмыйлар. Мәсәлән, вандаллар шәһәрнең төньяк-көнбатыш өлешендәге спорт мәйданчыгын да үз итә, уен зонасы элементларын ваталар, аларны яраксызлыкка чыгарып, кайчагында бала-чага өчен куркыныч тудырыр хәлгә китерәләр. Мондый “җимерүчеләрне” тотып, җәза бирергә, штраф салырга кирәктер. Шул чагында гына, башкаларның хезмәтен санга сугарлар, мөгаен.

Вадим Шәрифуллин фотосурәте