Баулы сабыйларына исем куштылар

Россиядә Гаилә елы уңаеннан, Баулы районы ЗАГС бүлегендә төрле бәйрәмнәр үткәрелә. Сабыйларга исем кушу һәм аларга беренче документларын тапшыру тантанасы – шуларның берсе.
Бәйрәмгә Кәримовлар, Давыдовлар, Мөхәммәдиевлар, Фәйзи, Мкртчян гаиләләре чакырылды. Алар яңа туган сабыйларына түбәндәге исемнәрне сайлаганнар: Амалия, Мәдинә, Динә, Фархан, Лариса. ЗАГС бүлеге башлыгы Сирена Мөрсәлимова ул исемнәрнең мәгънәләре турында сөйләде һәм аларның тууы турында дәүләт теркәвен үткәрде. Ата-аналар туу турында акт язмаларына имзаларын куйдылар.
Бәйрәм кунакларын Баулы районы башкарма комитеты җитәкчесенең социаль мәсьәләләр буенча урынбасары Илмира Хөснуллина котлады һәм гаиләләргә балаларның беренче документларын – туу турында таныклыкларын, чәчәкләр һәм бүләкләр тапшырды.
Әминә һәм Раил Кәримовларның гаилә коруына быел 15 ел тулачак. Алар моңа кадәр ике кыз – Адэлина һәм Ралинаны үстергәннәр. Күптән түгел алар күп балалы гаилә статусына  ия булганнар – өченче кызлары дөньяга килгән. Аңа Амалия исемен апалары Адэлина белән Ралина сайлаган.

“Өченче кызыбызның беренче документын ЗАГС бүлегендә зурлап тапшырулары – бик күңелле һәм сөенечле вакыйга. Бәйрәмне оештыручыларга зур рәхмәт”, – дип сөйләде Әминә Кәримова. 
“Өченче бала тугач, җаваплылык артты, күбрәк эшләргә кирәк хәзер”, – ди әти кеше Раил Кәримов.
Әминә Фаил кызы ветлечебницада эшли, ә Раил Рәис улы нефть өлкәсендә хезмәт куя. 
“Амалия – минем җиденче оныгым, – ди яңа туган сабыйның дәү әнисе Фәүзия Кәримова. –   Җиде онык әбисе булу – зур бәхет. Барысы да бәхетле-тәүфыйклы булсыннар. Илләргә тынычлык биреп, әти-әниләренә мәрхәмәтле булып, илебезгә тугрылыклы булып, матур гаилә булып яшәсеннәр”.