Баулы районында ифтар ашлары уза

Кызылъярда ифтар мәҗлесе, гадәттәгечә, зур әзерлек белән, оешкан төстә узды. Мәчеткә чама белән 85 кеше килде. Аларны авыл мәчете имам-хатыйбы Фәнис хәзрәт Хәлфетдинов сәламләде, ураза тотуның әҗер-савапларын аңлатты, вәгазь укыды.
“Ураза тоту –  безнең калебләребезне, йөрәкләребезне кирәкмәгән уй-фикерләрдән, эшләрдән, сүзләрдән чистартырга бер форсат”, – дип билгеләп үтте ул.
Ифтарда Баулы районы имам-мөхтәсибе Әнвәр хәзрәт Хәмитов та катнашты, мәчеткә килүчеләрне Рамазан ае белән котлады, ураза тотуның әһәмияте, кагыйдәләре турында сөйләде, чыгышын матур вәгазь белән дәвам итте.
Баулы районы башкарма комитеты җитәкчесе Данияр Бакиров сугышчыларга гуманитар ярдәм алып барулары, баулыларның блиндажда намаз бүлмәләре ясаулары турында сөйләде.
Ифтарга килүчеләрне Кызылъяр авыл җирлеге башлыгы Марсель Даутов та сәламләде.
Кызылъярлар, моңлы азан тавышыннан соң авыз ачып, ахшам намазына бастылар.
Ифтар мәҗлесе мул табын артында узды, һәркем күчтәнәч белән килгән иде.
“Ифтар үткәрелү турында игълан иткәннән соң, авылдашларыбыз мәҗлес оештырырга дип, финанс өлешләрен керттеләр, менә шундый битараф булмаган кешеләрнең иганә ярдәме белән мул табыннар кордык, – дип сөйләде “Баулы-информ” хәбәрчесенә Фәнис хәзрәт Хәлфетдинов. – Махсус хәрби операциядә катнашкан кешеләрне барлап үтү, динебез ягыннан аларга игътибар күрсәтү, зур кайгыларын  бәләкәй генә булса да уртаклашып, борчуларын азга гына булса да оныттырып торыйк дип үткәрдек ифтарны”. 
Фәнис хәзрәт игелекле гамәлнең Аллаһы ризалыгы өчен үткәрелүен билгеләп үтте.
“Алдагы тормышыбызда Аллаһы Тәгалә безгә ярдәм итсен, авылыбызда динебезне күркәм рәвештә таратырга насыйплардан булсын иде. Шушы эшләребез белән, бәлки, берәрсенең күңеленә шакый алырбыз”, – дип ассызыклады  ул.
Ифтар ашыннан соң, сугышчыларга, хәрбиләрнең гаиләләренә Кызылъяр авыл советы әзерләгән бүләкләр тапшырылды. Мәчеткә килә алмаган сугышчыларның туганнарына бүләкләрне өйләренә илтеп бирәчәкләр.
“Безне якты йөз, мул табын белән каршы алдылар. Ифтарга чакырганнары, сугышчыларның гаиләләренә шулай игътибар күрсәткәннәре өчен, зур рәхмәт”, – дип уртаклашты “Каха” позывнойлы сугышчы.
“Туган авылымда уза торган чараларда катнашам. Авылым күңелемә бик якын, кешеләрен дә яратам. Алар бөтен эшне дә, бик яхшы итеп, җиренә җиткереп оештыралар, – дип билгеләп үтте Баулыда яшәүче Зөлфия Булатова. –  Менә бүген сугышчыларның, туганнарының күңелләрен күреп, ифтар ашларына чакырулары бик тә күркәм эш, оештыручыларга зур рәхмәт. Алдагы көннәрдә дә очрашып торырга язсын. Илләребезгә тынычлык телим, солдатларыбызга исән-имин әйләнеп кайтырга насыйп булсын.
Ашка дога кылганнан соң, ястү намазы, 20 рәкагать тәравих һәм витр намазлары укылды. Авыл халкы ифтардан бик канәгать калды, тәмле ризыклардан тыш, рухи азык та алды.
“Ифтар мәҗелесе уздырырга ярдәм иткән авылдашларыбызга, табын әзерләүче, жыештыручы мөслимәләребезгә Аллаһы Тәгаләнең рәхмәте булсын. Кылган игелекләре белән Аллаһның ризалыгына ирешеп, яхшылыклары үзләренә изгелек булып кайтсын, – дип уртаклашты Кызылъяр ветераннар советы рәисе Серинә Вәлиева. –  Киләчәктә дә мәчетебездә хәерле, бәрәкәтле очрашулар насыйп булып, имамыбыз Фәнис хәзрәтнең үтемле вәгазьләрен тыңларга язсын. Тоткан уразаларыбыз кабул булсын. Елларга иминлек, гаиләләргә тигезлек, һәр йортка бәрәкәт насыйп булсын”.