Баулы районы ветераннарына юбилей медале тапшыралар

Фәхриямал Миңнегәрәй кызы Шәрәпова 1923 елда Татар Томбарлысы авылында ишле гаиләдә алтынчы бала булып дөньяга килә. 
1931-1935 елларда авыл мәктәбендә башлангыч белем ала. Аннары укуын дәвам итәргә Башкортстанның Ярмәкәй районы Иске Турай авылына китә. Анда бертуган апасында яшәп, җидееллык мәктәпне тәмамлый һәм Баулы урта мәктәбендә белем ала башлый. Биредә уку түләүле була, акча юклыктан, Фәхриямал апаны укудан туктаталар. Җитмәсә, өскә кияргә кием дә бик ярлы, китап-дәфтәрләр дә җитешми. Күп елый торгач, әти-әнисе, ничектер акча юнәтеп, аны кире укырга җибәрә. Шулай итеп, 1941 елда унынчы классны тәмамлап, белемгә омтылган кыз урта белем турында аттестат ала. Хәзер инде күңелдә яңа уйлар, хыяллар... Фәхриямал апаның да беркемгә әйтмәгән яшерен хыялы була: очучы яисә врач булу. Ләкин көтелмәгән сугыш дөньяның астын өскә китерә. Бу куркыныч хәбәр бар халыкны тетрәндерә, күз яшенә күмә. Авыл халкы ир-атларны фронтка озата. Фәхриямал апаның абыйсы да сугышка китә. Ул аның урынына колхозда хисапчы булып эшли башлый.
1941 елның көзендә кызны Баулы мәктәбенә укытучы итеп чакыралар. Шул елны ул комсомолга керә. Аңа авыл мәктәпләрендә дә укытырга, колхоз бригадиры ярдәмчесе булып эшләргә, комсомол оешмасы секретаре да булырга туры килә. Шул вакытта укучылар белән концерт, спектакльләр куярга да җитешәләр яшьләр. Ә җәйләрен иртәдән кичкә кадәр иген басуында көлтә бәйлиләр.
1945 елда тиз арада Бөгелмә педучилищесын тәмамлап, туган авылы Томбарлыда татар теле һәм әдәбияты укыта башлый кыз. Читтән торып Казан дәүләт педагогия институтының филология факультетына кереп, татар теле һәм әдәбияты бүлеген тәмамлый. Авыл мәктәбендә эш кайный: укытудан тыш, укучылар белән әдәбият түгәрәге оештыралар, стена газетасы чыгаралар, ата-аналар белән җыелыш, төрле кичәләр үткәрәләр.
1963 елда Фәхриямал апа, мәгариф өлкәсендә фидакарь хезмәте өчен Татарстанның атказанган укытучысы дигән мактаулы исемгә һәм медальга лаек була. Моннан тыш тырыш, намуслы хезмәте өчен бирелгән рәхмәт хатлары, грамоталары бик күп аның.
1957 елның июнендә Фәхриямал апаның гаиләсенә зур кайгы килә. Кинәт ут чыгып, аларның өйләре яна. Олы яшьтәге әнисе белән Фәхриямал апа урамда кала. Авыл кешеләре, туганнар, дуслар ярдәме белән өй җиткереп керәләр.
1965 елда Фәхриямал апаның иң кадерле кешесе – әнисе бу дөньядан китеп бара. Әнисез калуны бик авыр кичерә ул. Кайгы өстенә кайгы, үзе дә ныклап авырып, җиде ай больницада ята.
“Олы яшьтәге әниемне ташлап беркая да китәсем килмәде, –  ди Фәхриямал апа. – Үзем турында уйларга, кайгыртырга вакыт тимәде. Яшьлек хыяллары, тормыш мәшәкатьләре белән бергә, югалып калды. Сугыш бала чакны да, яшьлекне дә, туганнарны да урлады”, – ди, күз яшләре белән, күпне күргән чал чәчле апа.
Бертуган өч абыйсы сугыш кырында ятып кала аның.

Алай да ул тормышыннан зарланмый: бөтен гомеремне яраткан эшемә – балалар укытуга, тәрбияләүгә багышладым, ди. Аның укучылары, бүгенгесе көндә дә хәлен белеп, аралашып торалар.
Күп авырлыклар кичергән, 102 яшен тутыручы Фәхриямал апа бертуган апасының килене Сәрия апа тәрбиясендә, кадер-хөрмәттә матур картлык кичерә. Сәрия апаның балалары, оныклары өчен Фәхриямал апа – яраткан, кадерле дәү әни. Ул аларның күңел җылысын, игьтибарын тоеп яши, рәхмәтләр укый.
“Сәрия мине үз әниседәй карый, аңа рәхмәтем зур, миңа эшләгән яхшылыклары меңе белән әйләнеп кайтсын”, – дип тели Фәхриямал апа.
2024 елда, Бөек Ватан сугышы елларында республикабыз территориясендә хезмәт куйган Татарстан улларына һәм кызларына рәхмәт билгесе итеп, “Татарстан республикасы тыл геройлары”дип исемләнгән китап нәшер ителде. Бу томда Баулы районының 6396 хезмәтчәне турында мәгьлүмат тупланган. Шулар арасында авылдашыбыз, тыл ветераны, ТАССРның атказанган укытучысы, авылыбызның иң өлкән хөрмәтле кешесе Фәхриямал Миңнегәрәй кызы Шәрәпова да бар. Шушы көннәрдә аңа “Бөек Ватан сугышында Җиңүнең 80 еллыгы” юбилей медале һәм “Татарстанның тыл геройлары “ китабы тапшырылды.
Эльвира Әхмәтҗанова,
Татар Томбарлысы авылы