Баулылы тимер атны иярли

Язмабыз герое транспорт предприятиесендә утыз елдан артык хезмәт куя.
– Мин технологик транспорт идарәсендә 1993 елның августыннан бирле эшлим, – дип сөйләде Ришат Гыймранов. – Бу оешманың сайлавым юкка түгел, чөнки мин кечкенәдән үк техника янында кайнашырга яратам. – 1991 елда автотранспорт техникумын тәмамладым. Армиядән кайтуга ук, Баулы технологик транспорт идарәсенә эшкә кердем. Шуннан бирле эшлим. 
Ришат сүзләренә караганда, аның бөтен категорияләр буенча да диярлек машина йөртү таныклыгы бар. 
– Мин машина йөртү таныклыгын 1987 елда алган идем, транспорт йөртү тәҗрибәм – 30 елдан артык. Барлык категорияләр буенча да документым бар – А, В, С, Д, Е. Теләсә кайсы транспорт чарасы белән идарә итә алам.  Трамвайныкы гына юк, – ди тәҗрибәле машина йөртүче.
Бу оешмада Ришатның беренче транспорты ГАЗ-66 булган. 
– Технологик транспорт идарәсендә эшли башлаган вакытта мин ППД операторларын йөрттем. Алар скважиналарга хезмәт күрсәтәләр һәм скважиналарның дебитын тикшерәләр иде, – дип искә ала машина йөртүче булып эшли башлаган вакытларын Ришат. – 10 елдан соң, читтән торып, Уфа аграр университетында белем алдым. Аннары мине мастер итеп куйдылар.
Язмабыз герое үзенең беренче шәхси автомобилен дә яхшы хәтерли. Ул аны заманында кредитка алган булган. 
– Мин ВАЗ-2106 маркалы автомобильдә йөри башладым (фотосы – аста). Без аны тормыш иптәшем белән 1998 елда сатып алдык. Кредитка алдык, чөнки без яшь гаилә идек, хезмәт хакларыбыз машина алырга җыярык түгел иде. Шулай да без аны тиз түләп бетердек, – ди Ришат Гыймранов. – Хәзерге вакытта без Япониядә җитештерелгән “Мазда СХ5” машинасында йөрибез. 8 ел була инде, проблема юк.
Ул машина йөртү таныклыгын алган вакытларны исенә алды. 
– Иң беренче В һәм С категорияле машина йөртү таныклыгын Уфада автотранспорт техникумында укыганда алдым. Имтиханны беренче баруда ук бирдем. Яшь чагымда мин яхшы укыдым, кагыйдәләрне дә, машина йөртүне дә беренче керүдә тапшырып чыктым, проблема булмады, – дип искә ала Ришат. 
Без тәҗрибәле шофёрның машина йөртү таныклыгы алганнан бирле ничә автомобиль алыштыруы белән дә кызыксындык. 
– Моңа кадәр дүрт машина алыштырдым: беренчесе ВАЗ-2106 иде, аннары – ВАЗ-21010, ВАЗ-2214, хәзергесе – «Мазда СХ5», – дип җавап бирде Ришат.  
Безнең әңгәмәдәшебез билгеләп үткәнчә, машина йөртүче ир-ат яки хатын-кыз булуга карамастан, юлда сак булырга һәм юл хәрәкәте кагыйдәләрен катгый үтәргә кирәк.
– Минем ир-ат һәм хатын-кыз машина йөртүче арасында аерма күрмим. Машина белән кем генә идарә итмәсен, шофёр кеше адекват булырга тиеш. Бүгенге көндә юлларда руль артында адекват булмаган ир-атлар да, хатын-кызлар да очрап тора. Минем дә сирәк кенә кагыйдә бозган очраклар булганлый. Ансыз булмый, чөнки елга берничә тапкыр юл тамгалары буенча эләгәсең.
Машина йөртү тәҗрибәсен искә алып, Ришат Гыймранов юлда гаиләсе  белән булган бер онытылмаслык очракны искә алды. 
– Быел гаиләбез белән Соль-Илецк шәһәренә бардык. Соң гына, төнге 12ләрдә юлга кузгалдык. Алдан йокламадым, йокы килмәде. Таң аткандарак йокы баса башлады, аздан гына юл читенә чыгып очмадык. Ярый әле янымда барган тормыш иптәшем йокламаган, ул кычкырып җибәрде. Әйбәт кенә барып җиттек. Бу вакыйга минем күңелемә гомерлеккә кереп калды, – дип билгеләп үтте Ришат.
Язмабыз герое сүзләренчә, аның ике кызы бар, берсе машина йөртә.
– Олы кызыма 25 яшь, Самарада яши, табиб-стоматолог булып эшли, үзенең машинасы бар. Кече кызыбыз безнең белән яши, – ди ул.
Әңгәмәбез ахырында Ришат Гыймранов газетабыз аша барлык машина йөртүчеләрне Автомобильче көне белән тәбрик итте.
– Машина йөртүчеләрне һөнәри бәйрәмебез белән котлыйм, имин юллар телим. Кышка аяк атлаган мәлләрдә юлларда аеруча сак булсыннар иде, – дип, теләкләрен белдерде ул. 
Ришат Гыймранов билгеләп үткәнчә, статистика буенча, машина йөртүче транспорт чарасы белән идарә итә башлавының беренче биш елында бөтен кагыйдәләрне дә төгәл үтәп йөри. Тик, тора-бара, машина йөртүче үзен белгеч итеп саный башлый һәм юл хәрәкәте кагыйдәләрен боза башлый. Шуңа күрә, кеше ничә яшьтә булуына, машина йөртү тәҗрибәсе күпме булуга карамастан, кагыйдәләрне катгый үтәп йөрергә, сак булырга тиеш.